പെര്‍ത്ത്: വനിത ട്വന്റി20 ലോകകപ്പില്‍ ബംഗ്ലാദേശിനെതിരെ ഇന്ത്യക്ക് 18 റണ്‍സ് ജയം. ടോസ് നഷ്ടപ്പെട്ട് ബാറ്റിംഗിനിറങ്ങിയ ഇന്ത്യ നിശ്ചിത 20 ഓവറില്‍ 6 വിക്കറ്റ് നഷ്ടത്തില്‍ 142 റണ്‍സ് എടുത്തു. 143 റണ്‍സെന്ന താരതമ്യേന ചെറിയ സ്‌കോര്‍ പിന്തുടര്‍ന്ന ബംഗ്ലാദേശിന് 8 വിക്കറ്റ് നഷ്ടത്തില്‍ 124 റണ്‍സ് എടുക്കാനെ കഴിഞ്ഞുള്ളൂ.
ഇന്നിംഗ്‌സിന്റെ തുടക്കത്തില്‍ തന്നെ ഓപ്പണര്‍ തനിയ ഭാട്ടിയ(2)യുടെ വിക്കറ്റ് ഇന്ത്യക്ക് നഷ്ടമായിരുന്നു. മറുഭാഗത്ത് വെടിക്കെട്ട് ബാറ്റിംഗ് പുറത്തെടുത്ത ഷഫാലി വര്‍മ്മ 17 പന്തില്‍ 4 സിക്‌സറുകളുടേയും 2 ബൗണ്ടറികളുടേയും അകമ്പടിയോടെ 39 റണ്‍സ് എടുത്തു. ജെമിമ റോഡ്രിഗസ് 34 റണ്‍സും അവസാന നിമിഷം ആഞ്ഞടിച്ച വേദ കൃഷ്ണമൂര്‍ത്തി 11 പന്തില്‍ 20 റണ്‍സും നേടി. ഷഫാലി വര്‍മ്മയാണ് കളിയിലെ താരം.
മറുപടി ബാറ്റിംഗില്‍ ബംഗ്ലാദേശിന്റെ തുടക്കവും തകര്‍ച്ചയോടെയായിരുന്നു. സ്‌കോര്‍ ബോര്‍ഡില്‍ 5 റണ്‍സ് കൂട്ടിച്ചേര്‍ത്തപ്പോഴേക്കും ബംഗ്ലാദേശിന് ഷമീമ സുല്‍ത്താനയുടെ വിക്കറ്റ് നഷ്ടമായിരുന്നു. 30 റണ്‍സെടുത്ത മുര്‍ഷിദ ഖത്തൂണിന്റേയും 35 റണ്‍സെടുത്ത നിഗര്‍ സുല്‍ത്താനയുടേയും പ്രകടനം മാറ്റി നിര്‍ത്തിയാല്‍ ബംഗ്ല നിരയില്‍ മറ്റാര്‍ക്കും കാര്യമായ സംഭാവന ചെയ്യാനായില്ല.
ഇന്ത്യക്കു വേണ്ടി പൂനം യാദവ് 4 ഓവറില്‍ 18 റണ്‍സ് വഴങ്ങി 3 വിക്കറ്റ് സ്വന്തമാക്കി. 2 വിക്കറ്റുകള്‍ വീതം വീഴ്‌ത്തിയ ശിഖ പാണ്ഡെയുടേയും അരുന്ധതി റെഡ്ഡിയുടേയും പ്രകടനം ഇന്ത്യന്‍ വിജയത്തില്‍ നിര്‍ണായകമായി. രാജേശ്വരി ഗയക്‌വാദ് ഒരു വിക്കറ്റ് വീഴ്‌ത്തി.
