മാഡ്രിഡ്: ചാമ്പ്യന്‍സ് ലീഗ് പ്രീ ക്വാര്‍ട്ടറില്‍ ഇന്ന് വമ്പന്‍ പോരാട്ടം. സ്പാനിഷ് ലീഗിലെ കരുത്തരായ റയല്‍ മാഡ്രിഡും ഇംഗ്ലീഷ് പ്രീമിയര്‍ ലീഗിലെ വമ്പന്‍മാരായ മാഞ്ചസ്റ്റര്‍ സിറ്റിയും ഇന്ന് നേര്‍ക്കുനേര്‍ ഇറങ്ങും. മറ്റൊരു മത്സരത്തില്‍ ഇറ്റാലിയന്‍ സിരി എയില്‍ കുതിപ്പ് തുടരുന്ന യുവന്റസ് ലിയോണിനെ നേരിടും.
സിദാന് കീഴില്‍ മികച്ച ടീമായി തിരിച്ചെത്തിയ റയല്‍ മാഡ്രിഡും ഗാര്‍ഡിയോളക്ക് കീഴില്‍ റഹീം സ്റ്റെര്‍ലിംഗിന്റെ ഗോളടി മികവില്‍ മുന്നേറുന്ന സിറ്റിയും ഏറ്റുമുട്ടുമ്പോള്‍ ആവേശം വാനോളം ഉയരുമെന്ന് ഉറപ്പാണ്. സ്വന്തം കാണികള്‍ക്കു മുന്നില്‍ ഇറങ്ങുന്നത് റയലിന് മുന്‍തൂക്കം നല്‍കുന്നു.
അതേസമയം, ക്രിസ്റ്റ്യാനോ റൊണാള്‍ഡോയുടെ ഗോളടി മികവില്‍ മുന്നേറുന്ന യുവന്റസിന് വെല്ലുവിളി ഉയര്‍ത്താന്‍ കഴിവുള്ള താരങ്ങള്‍ ലിയോണിനുണ്ട്. എങ്കിലും അവസാനം കളിച്ച അഞ്ച് മത്സരങ്ങളില്‍ ഒരെണ്ണത്തില്‍ മാത്രമാണ് ലിയോണ്‍ വിജയിച്ചത്. മറുഭാഗത്ത് റൊണാള്‍ഡോക്ക് പുറമെ വമ്പന്‍ നിരയുമായി ഇറങ്ങുന്ന യുവന്റസ് മികച്ച ഫോമിലാണ്.
