മുംബൈ: പുതിയ ലാന്ഡ് റോവര് ഡിഫെന്ഡറിന് ഇന്ത്യയില് ബുക്കിംഗ് ആരംഭിച്ച് ജഗ്വാര് ലാന്ഡ് റോവര് ഇന്ത്യ. രണ്ട് വ്യത്യസ്ത ബോഡി സ്റ്റൈലുകളില് ലഭ്യമാകുന്ന ഡിഫൻഡറിന്റെ വില 69.99 ലക്ഷം മുതലാണ്. മൂന്ന് ഡോറുകളുള്ള എലഗന്റ്90, അഞ്ച് ഡോറുകളുള്ള വെഴ്സറ്റൈല് എന്നീ ബോഡിസ്റ്റൈലുകളിലാണ് വാഹനം ലഭ്യമാകുക.
90, 110 ബോഡി സ്റ്റൈലുകളില് അഞ്ച് വ്യത്യസ്ത വേരിയന്റുകളില് പുതിയ ഡിഫന്ഡര് ലഭിക്കും. ബേസ്, എസ്, എസ്ഇ, എച്ച്എസ്ഇ, ഫസ്റ്റ് എഡിഷന് എന്നിവയാണിവ. സാഹസികത ഇഷ്ടപ്പെടുന്നവരെ ഉദ്ദേശിച്ച് നിര്മ്മിച്ച പുതിയ ഡിഫന്ഡര് വിവിധ സീറ്റിംഗ് ഓപ്ഷനുകള്, ആക്സസറി പാക്കുകള്, സവിശേഷതകള് എന്നിവയോടെ തികച്ചും കസ്റ്റമൈസബിളാണ്. 360 ഡിഗ്രി സറൗണ്ട് ക്യാമറ, വേഡ് സെന്സിംഗ്, ഇലക്ട്രോണിക് എയര് സസ്പെന്ഷന്, സ്മാര്ട്ട് ഫോൺ പാക്ക്, കണക്ടഡ് നാവിഗേഷന് പ്രോ, ഓഫ് റോഡ് ടയറുകള്, സെന്റര് കൺസോള്, റഫ്രിജറേറ്റഡ് കംപാര്ട്മെന്റ് (ഓപ്ഷണല്) തുടങ്ങിയ സവിശേഷതകളോടെയാണ് പുതിയ ഡിഫന്ഡറിന്റെ ഇന്ത്യയിലെ അവതരണം.
ആധുനികമായ 21-ാം നൂറ്റാണ്ട് പാക്കേജില് നിന്നും പാരമ്പര്യമുള്ക്കൊള്ളുന്നതാണ് പുതിയ ഡിഫന്ഡറെന്ന് ജഗ്വാര് ലാന്ഡ് റോവര് ഇന്ത്യ ലിമിറ്റഡ് പ്രസിഡന്റ് & മാനേജിംഗ് ഡയറക്ടര് രോഹിത് സൂരി പറഞ്ഞു. ഓൺ റോഡിലും ഓഫ് റോഡിലും അങ്ങേയറ്റം ശേഷി പുലര്ത്തുന്ന ഈ വാഹനത്തിന്റെ ഇന്ത്യാ പ്രവേശനത്തില് അതിരറ്റ അഭിമാനമാണ് തങ്ങള്ക്കുള്ളത്. കാര്യക്ഷമതയാര്ന്നതും ദീര്ഘകാല ഉപയോഗത്തിനുള്ളതുമായ വാഹനശ്രേണിയുടെ ഭാഗമാണിത്. ഒറിജിനലിന്റെ ആധികാരികതയും സ്വഭാവസവിശേഷതകളും നിലനിര്ത്തിയാണ് ഈ അവതരണമെന്നും അദ്ദേഹം പറഞ്ഞു.
