ക്രൈസ്റ്റ് ചര്‍ച്ച്: ഇന്ത്യ-ന്യൂസിലന്‍ഡ് രണ്ടാം ടെസ്റ്റിലും കെണിയൊരുക്കി കീവീസ്. ആദ്യ മത്സരത്തിനു സമാനമായി രണ്ടാം ടെസ്റ്റിലും ബൗളിംഗ് പിച്ചാണ് ഇന്ത്യക്കായി ന്യൂസിലന്‍ഡ് തയ്യാറാക്കിയത്. പച്ചപ്പ് നിറഞ്ഞ പിച്ച് തന്നെയാണ് രണ്ടാം ടെസ്റ്റിലും ഇന്ത്യയെ കാത്തിരിക്കുന്നത്.
ആദ്യ മത്സരത്തില്‍ കീവീസ് പേസര്‍മാരുടെ മുന്നില്‍ ഇന്ത്യന്‍ മുന്‍നിരക്ക് അടിപതറിയിരുന്നു. പുല്‍നാമ്പുകള്‍ നിറഞ്ഞു നില്‍ക്കുന്ന പിച്ച് പേസര്‍മാരെ കൈ അയച്ചു സഹായിക്കുന്ന കാഴ്ചയാണ് ആദ്യ ടെസ്റ്റില്‍ ഉടനീളം കണ്ടത്. ട്രെന്‍ഡ് ബോള്‍ട്ട്, ടിം സൗത്തി, കൈലി ജാമിസണ്‍ ത്രയം ഇന്ത്യന്‍ മുന്‍നിര ബാറ്റ്‌സ്മാന്‍മാര്‍ക്ക് വെല്ലുവിളി ഉയര്‍ത്തിയെങ്കിലും കീവീസ് ബാറ്റ്‌സ്മാരെ പിടിച്ചുകെട്ടാന്‍ ഇന്ത്യന്‍ പേസ് നിരക്ക് കഴിഞ്ഞില്ല താനും.
ഫെബ്രുവരി 29നാണ് രണ്ടാം ടെസ്റ്റ് നടക്കുക. 360 പോയിന്റുമായി ലോക ചാമ്പ്യന്‍ഷിപ്പില്‍ ഒന്നാം സ്ഥാനത്തുള്ള ഇന്ത്യക്ക് അടുത്ത മത്സരം നിര്‍ണായകമാണ്. നിലവില്‍ 120 പോയിന്റുള്ള ന്യൂസിലന്‍ഡ് അഞ്ചാം സ്ഥാനത്താണ്. രണ്ടാം ടെസ്റ്റുകൂടി ജയിക്കാനായാല്‍ കീവീസിന് 120 പോയിന്റ് സ്വന്തമാക്കാം.
