ക്രൈസ്റ്റ് ചര്ച്ച്: ഇന്ത്യ-ന്യൂസിലന്ഡ് പരമ്പരയിലെ നിര്ണായകമായ രണ്ടാം ടെസ്റ്റ് നാളെ ക്രൈസ്റ്റ് ചര്ച്ചില്. ആദ്യ മത്സരം കൈവിട്ട ഇന്ത്യക്ക് പരമ്പര നഷ്ടപ്പെടാതിരിക്കണമെങ്കില് നാളത്തെ മത്സരത്തില് വിജയിച്ചേ മതിയാകൂ. അതേസമയം, പരമ്പര തൂത്തുവാരാനാകുമെന്ന പ്രതീക്ഷയിലാണ് ആതിഥേയര്.
ആദ്യ ടെസ്റ്റിനു സമാനമായ രീതിയില് ബൗളിംഗ് പിച്ച് തന്നെയാണ് ക്രൈസ്റ്റ് ചര്ച്ചിലും ഒരുങ്ങുന്നത്. ബോള്ട്ടും സൗത്തിയും നേതൃത്വം നല്കുന്ന പേസ് ആക്രമണത്തിനു മുന്നില് ഇന്ത്യന് മുന്നിര ബാറ്റ്സ്മാന്മാരെല്ലാം തന്നെ അടിപതറിയ കാഴ്ചയാണ് ആദ്യ മത്സരത്തില് കണ്ടതെങ്കില് അതിനു സമാനമായി പച്ചപ്പുള്ള പിച്ച് തന്നെയാണ് ഇന്ത്യയെ കാത്തിരിക്കുന്നത്. ഇന്ത്യന് ടീമില് എന്തൊക്കെ മാറ്റങ്ങളുണ്ടാകുമെന്ന കാര്യത്തിലും ആരാധകര് ആകാംക്ഷയിലാണ്.
പരിക്കേറ്റ ഓപ്പണര് പൃഥ്വി ഷായ്ക്കു പകരം യുവതാരം ശുഭ്മാന് ഗില് പ്ലേയിംഗ് ഇലവനില് സ്ഥാനം പിടിച്ചേക്കും. ഹനുമ വിഹാരിക്ക് പകരം രവീന്ദ്ര ജഡേജയും റിഷഭ് പന്തിന് പകരം വൃദ്ധിമാന് സാഹയും ടീമിലെത്താന് സാധ്യതയുണ്ട്. സ്ഥിരതയില്ലാത്ത ടീം സെലക്ഷനെതിരെ വിമര്ശനവുമായി കപില് ദേവ് ഉള്പ്പെടെയുള്ള മുന് താരങ്ങള് രംഗത്തുവന്ന സാഹചര്യത്തില് ഏവരും ഉറ്റുനോക്കുന്നതും നാളെ ഇറങ്ങുന്ന ടീം ഇന്ത്യയെ തന്നെയായിരിക്കും.
