സാന്റിയാഗോ ബെർണബ്യൂ: പൊടിപാറിയ എൽ ക്ലാസിക്കോയിൽ ഗോൾ നേടുന്ന ഏറ്റവും പ്രായം കുറഞ്ഞ താരമെന്ന റെക്കോർഡ് ഇനി റയൽ മഡ്രിഡിന്റെ വിനിഷ്യസ് ജൂനിയറിന്. ബാഴ്സയ്ക്കെതിരായി നടന്ന പോരാട്ടത്തിൽ സ്വന്തം മൈതാനമായ സാന്റിയാഗോ ബെർണബ്യൂവിൽ നേടിയ ഗോളോടെയാണ് ഈ നേട്ടം വിനിഷ്യസിന്റെ പേരിലായത്.
ഇന്നലെ ഗോൾ നേടുമ്പോൾ 19 വയസും 233 ദിവസവുമാണ് ബ്രസീലിയൻ താരമായ വിനിഷ്യസിന്റെ പ്രായം. 2007-ൽ സാക്ഷാൽ ലയണൽ മെസി സ്വന്തമാക്കിയ നേട്ടമാണ് വിനിഷ്യസ് മറികടന്നത്. അന്ന് റയലിനെതിരെ ഗോൾ നേടുമ്പോൾ 19 വർഷവും 259 ദിവസവുമായിരുന്നു ബാഴ്സ താരം മെസിയുടെ പ്രായം.
എൽ ക്ലാസിക്കോ വിജയത്തോടെ റയൽ മഡ്രിഡ് പോയിന്റ് പട്ടികയിൽ ഒന്നാം സ്ഥാനത്തേക്ക് മുന്നേറി. എതിരില്ലാത്ത രണ്ട് ഗോളിനാണ് റയലിന്റെ ജയം. വിനിഷ്യസിന് പുറമെ മരിയാനോ ഡയസാണ് റയലിനായി വലകുലുക്കിയത്. ഏറെ നാളുകൾക്ക് ശേഷമാണ് റയൽ മാഡ്രിഡ് സ്വന്തം മൈതാനത്ത് ലാ ലിഗ എൽ ക്ലാസിക്കോ പോരാട്ടത്തിൽ വിജയം നേടുന്നത്.
