വെസ്റ്റ് ഇൻഡീസിന്റെ വെടിക്കെട്ട് താരം കീറൺ പൊള്ളാർഡിനെ അറിയാത്ത ക്രിക്കറ്റ് ആരാധകർ ഉണ്ടാവില്ല. ട്വന്റി 20 സ്പെഷ്യലിസ്റ്റായി അറിയപ്പെടുന്ന പൊള്ളാർഡ് ഇപ്പോഴിതാ ക്രിക്കറ്റിൽ പുതിയൊരു ചരിത്രം തന്റെ പേരിൽ എഴുതിച്ചേർത്തിരിക്കുകയാണ്. ലോകക്രിക്കറ്റിൽ 500 ട്വന്റി 20 മത്സരങ്ങൾ കളിക്കുന്ന ആദ്യ താരമെന്ന നേട്ടമാണ് പൊള്ളാർഡ് സ്വന്തമാക്കിയത്.
ശ്രീലങ്കക്കെതിരായ ട്വന്റി20 പരമ്പരയിലെ ആദ്യ മത്സരത്തിലിറങ്ങിയതോടെയാണ് താരം നേട്ടത്തിലെത്തിയത്. പൊള്ളാർഡിന് 500 എന്ന നമ്പറുള്ള ജഴേസി നൽകിയാണ് സഹതാരങ്ങൾ നേട്ടം ആഘോഷിച്ചത്.
പട്ടികയിൽ ആദ്യ മൂന്ന് സ്ഥാനത്തുള്ളതും വിൻഡീസ് താരങ്ങളാണെന്നതും ശ്രദ്ധേയമാണ്. പൊള്ളാർഡിന് പിന്നിലായി രണ്ടാമതുള്ളത് ഡ്വെയിൻ ബ്രാവോയാണ്. 453 ട്വന്റി20 മത്സരങ്ങളാണ് ബ്രാവോ കളിച്ചത്. മൂന്നാം സ്ഥാനത്തുള്ളത് വെടിക്കെട്ട് ഓപ്പണർ ക്രിസ് ഗെയ് ലാണ്. 404 ട്വന്റി20 മത്സരങ്ങളാണ് ഗെയ് ൽ ഇതുവരെ കളിച്ചിട്ടുള്ളത്.
വിൻഡീസ് ദേശീയ ടീമിന് പുറമേ നിരവധി ലീഗുകളിൽ വിവിധ ടീമുകളുടെ താരം കൂടിയാണ് പൊള്ളാർഡ്. ഇന്ത്യൻ പ്രീമിയർ ലീഗിൽ മുംബൈ ഇന്ത്യൻസിന്റെ താരമാണ് അദ്ദേഹം. മുംബൈ ഇന്ത്യൻസ് വിവിധ വർഷങ്ങളിലെ ലേലങ്ങളിൽ ഒഴിവാക്കാതെ ടീമിനൊപ്പം തന്നെ നിലനിർത്തിയ ചുരുക്കം ചില താരങ്ങളിൽ ഒരാളായ പൊള്ളാർഡ് ഇപ്പോൾ വിൻഡീസിന്റെ നായകൻ കൂടിയാണ്.
ഇതിനൊപ്പം ഇന്നത്തെ മത്സരത്തിൽ മറ്റൊരു നേട്ടം കൂടി പൊള്ളാർഡ് സ്വന്താമക്കി. ട്വന്റി 20യിൽ 10000 റൺസെന്ന നേട്ടമാണ് അദ്ദേഹത്തെ തേടിയെത്തിയത്.
