ബെര്ലിന്: ചാമ്പ്യന്സ് ലീഗില് രണ്ടാംപാദത്തിലെ തോല്വിയോടെ ടോട്ടനം പുറത്ത്. ജര്മ്മന് ക്ലബ്ബായ ലീപ്സെഗാണ് 3-0ന് ഇന്നലെ ഇംഗ്ലീഷ് ക്ലബ്ബിന്റെ പ്രതീക്ഷ തകര്ത്തത്. ആദ്യപാദത്തിലെ 1-0ന്റെ തോല്വിയോടെ ടോട്ടനം ആകെ 4-0ന്റെ തോല്വിയാണ് ഏറ്റുവാങ്ങിയിരിക്കുന്നത്. കഴിഞ്ഞ സീസണിലെ റണ്ണറപ്പായ ടോട്ടനത്തിന് കനത്ത ആഘാതമാണ് ഇന്നത്തെ തോല്വി. 2018-19 ലീഗില് ലിവര്പൂളാണ് 2-0ന് ടോട്ടനത്തിനെ തോല്പ്പിച്ചത്.
പരിക്കുകള് വിനയായ ടോട്ടനത്തിനെ തീര്ത്തും നിഷ്പ്രഭമാക്കിയാണ് സ്വന്തം തട്ടകത്തില് ലീപ്സെഗ് മുന്നേറിയത്. മാര്സെല് സാബിറ്റ്സറിന്റെ ഇരട്ട ഗോളുകളാണ് ലീപ്സെഗിനെ ശക്തമായ നിലയിലെത്തിച്ചത്. 10 മിനിറ്റിലും 21-ാം മിനിറ്റിലുമാണ് മാര്സെല് ടോട്ടനത്തിന്റെ വലചലിപ്പിച്ചത്. 87-ാം മിനിറ്റില് എമിലിന്റെ ഗോളില് ലീപ്സെഗ് ജയം ആധികാരികമാക്കി.
മുമ്പത്തെ മത്സരങ്ങളിലെ തോല്വിയോടെയാണ് ടോട്ടനം പ്രീക്വാര്ട്ടര് ദ്വിപാദ മത്സരത്തിനിറങ്ങിയത്. ബയേണിനെതിരെ 1-3ന്റെ തോല്വി ഏറ്റുവാങ്ങിയെങ്കിലും പോയിന്റ് നിലവച്ച് പ്രീക്വാര്ട്ടറിലിടം നേടി. അതിന് തൊട്ടുമുമ്പുള്ള കളിയില് ഒളിമ്പിയാക്കോസിനെ4-2ന് തോല്പ്പിച്ച വീറും വാശിയും പക്ഷെ ലീപ്സെഗിന് മുന്നില് പുറത്തെടുക്കാന് ടോട്ടനത്തിനായില്ല. ഇതോടെ അടുത്ത സീസണ് സാധ്യത മങ്ങിയെന്ന് പരിശീലകനായ മോറിഞ്ഞോ നിരാശയോടെ പറഞ്ഞു.
