ന്യൂഡല്ഹി: വാഹന പ്രേമികള് ഏറെ നാളായി കാത്തിരിക്കുകയായിരുന്ന ചേതക് ഇലക്ട്രിക്കിന്റെ വിതരണം ആരംഭിച്ചു. പൂനെയിലും ബംഗളൂരുവിലുമാണ് ഉപഭോക്താക്കള്ക്ക് ചേതക് ഇലക്ട്രിക് വിതരണം ചെയ്തിരിക്കുന്നത്. അടിസ്ഥാന മോഡലായ അര്ബന് വേരിയെന്റിന് 1 ലക്ഷം രൂപയാണ് വില. പ്രീമിയം വിഭാഗത്തിന് 1.15 ലക്ഷം രൂപയാണ് പ്രതീക്ഷിക്കുന്നത്.
നിയോ-റെട്രോ രൂപഭംഗിയുള്ള പ്രീമിയം ഇലക്ട്രിക് സ്കൂട്ടറാണ് പുതിയ ബജാജ് ചേതക്. വൃത്താകൃതിയിലുള്ള ഹെഡ് ലാംപ്, വീതി കൂടിയ എപ്രോണ്, ആകാരവടിവുള്ള ബോഡി പാനലുകള് എന്നിവ പഴയകാല ചേതക്കില് നിന്ന് കടമെടുത്തപ്പോള് കറുപ്പ് നിറത്തിലുള്ള റിയര്വ്യൂ മിറര്, അലോയ് വീലുകള്, എല്ഇഡി ലൈറ്റിങ്, എല്ഇഡി റെയില് ലാംപ്, ഡേടൈം റണ്ണിങ് ലാമ്പുകള്, രണ്ടായി ഭാഗിച്ച റെയില് ലാംപ് ക്ലസ്റ്റര് എന്നിവ ചേതക്കിന് ആധുനിക മുഖഭാവം നല്കുന്നു.
15 വര്ഷത്തെ ഇടവേളയ്ക്ക് ശേഷമാണ് ചേതക് എന്ന പേര് വീണ്ടും ആരാധകരുടെ മനസിലേക്ക് തിരിച്ചെത്തുന്നത്. മധ്യവര്ഗക്കാരന്റെ സ്വപ്നമായിരുന്നു ഒരു കാലത്ത് ചേതക്. ഹമാരാ ബജാജ് എന്ന മുദ്രവാക്യത്തോടെ രാജ്യം നെഞ്ചേറ്റിയ സാധാരണക്കാരന്റെ വാഹനമായിരുന്നു ചേതക്. 1972-ല് ബജാജ് അവതരിപ്പിച്ച ചേതക് 2006-ലാണ് നിര്മ്മാണം അവസാനിപ്പിച്ചത്. പേര് ഒന്നാണെങ്കിലും പഴയ ചേതകിനോട് സമാനതകളൊന്നും ഇ-ചേതകിനില്ല. റെട്രോ ഡിസൈനിന് പ്രാധാന്യം നല്കിയാണ് ഇ-ചേതകിന്റെ രൂപ കല്പന.