മുംബൈ: രാജ്യത്ത് കോവിഡ് 19 ആശങ്ക നിലനിൽക്കുന്ന സാഹചര്യത്തിൽ ഇന്ത്യൻ പ്രീമിയർ ലീഗ് ക്രിക്കറ്റ് മത്സരങ്ങൾ മാറ്റിവച്ചു. ഈ മാസം 29 ന് ആരംഭിക്കാനിരുന്ന മത്സരങ്ങൾ ഏപ്രിൽ 15 ന് ശേഷം മാത്രമേ ആരംഭിക്കൂ. ഇക്കാര്യം ബിസിസിഐ അറിയിച്ചതായി ഫ്രാഞ്ചൈസികൾ പ്രതികരിച്ചു. ബിസിസിഐയുടെ ഔദ്യോഗിക പ്രഖ്യാപനം ഉടനുണ്ടാകും.
കോവിഡിന്റെ സാഹചര്യത്തിൽ രാജ്യത്ത് ഏപ്രിൽ 15 വരെ വിസ നിയന്ത്രണമുണ്ട്. ഇതിന്റെ കൂടി പശ്ചാത്തലത്തിലാണ് ഏപ്രിൽ 15 ന് മത്സരങ്ങൾ നടത്തിയാൽ മതിയെന്ന തീരുമാനത്തിൽ ബിസിസിഐ എത്തിയത്. ഇതിനൊപ്പം മത്സരം നടത്താനാവില്ലെന്ന നിലപാട് ചില സംസ്ഥാന സർക്കാർ സ്വീകരിക്കുകയും ചെയ്തിരുന്നു.
കഴിഞ്ഞ സീസണിലെ ഫൈനലിസ്റ്റുകളായ മുംബൈ ഇന്ത്യൻസും ചെന്നൈ സൂപ്പർ കിംഗ്സും തമ്മിൽ ഈ മാസം 29 ന് വാംഖഡെ സ്റ്റേഡിയത്തിലായിരുന്നു ഉദ്ഘാടന മത്സരം നിശ്ചയിച്ചിരുന്നു. മത്സരങ്ങൾ മാറ്റിവെക്കാൻ തീരുമാനമെടുത്ത സാഹചര്യത്തിൽ പുതുക്കിയ ഷെഡ്യൂൾ ഉടൻ തന്നെ പുറത്തിറക്കിയേക്കും.
