സിഡ്നി: കോവിഡ് 19 സംശയത്തില് നിരീക്ഷണത്തിലായിരുന്ന ന്യൂസിലന്ഡ് പേസര് ലോക്കി ഫെര്ഗൂസണ് രോഗ ബാദയില്ലെന്ന് കണ്ടെത്തി. ഓസ്ട്രേലിയക്കെതിരെ നടന്ന ആദ്യ ഏകദിനത്തിന് പിന്നാലെയാണ് ഫെര്ഗൂസണെ ഐസൊലേഷനില് പ്രവേശിപ്പിച്ചത്. തൊണ്ട വേദന അനുഭവപ്പെട്ടതിനെ തുടര്ന്നായിരുന്നു താരത്തെ ആശുപത്രിയില് പ്രവേശിപ്പിച്ചത്.
പരിശോധന ഫലം നെഗറ്റീവായതോടെ ഫെര്ഗൂസണ് നാളെ നാട്ടിലേക്ക് മടങ്ങും. ന്യൂസിലന്ഡിലെത്തിയ ശേഷവും അദ്ദേഹം ഐസൊലേഷന് വിധേയനാകേണ്ടി വരുമെന്നാണ് റിപ്പോര്ട്ട്. രാജ്യത്തേക്ക് പ്രവേശിക്കുന്നവര്ക്ക് 14 ദിവസത്തെ സ്വമേധയാലുള്ള ഐസോലേഷന് ന്യൂസിലന്ഡ് നിര്ബന്ധമാക്കിയിട്ടുണ്ട്.
കോവിഡ് 19 പടരുന്ന സാഹചര്യത്തില് ഓസ്ട്രേലിയക്കെതിരായ ഏകദിന പരമ്പര ന്യൂസിലന്ഡ് ഉപേക്ഷിച്ചിരുന്നു. നേരത്തെ, ഓസ്ട്രേലിയന് പേസര് കെയ്ന് റിച്ചാഡ്സണും കോവിഡ് ബാധ സംശയിച്ചിരുന്നു. പിന്നീട് നടത്തിയ പരിശോധനയില് ഫലം നെഗറ്റീവാണെന്ന് കണ്ടെത്തുകയായിരുന്നു.
