ന്യൂഡല്ഹി: രാജ്യം ഒന്നാകെ കൊറോണ വൈറസിനെതിരെ പോരാടുമ്പോള് പ്രതിരോധ പ്രവര്ത്തനങ്ങളില് പങ്കാളിയായി ഇന്ത്യന് ബാഡ്മിന്റണ് താരം പി.വി സിന്ധു. പ്രതിരോധ പ്രവര്ത്തനങ്ങള്ക്ക് 10 ലക്ഷം രൂപ സിന്ധു സംഭാവന ചെയ്തു. ആന്ധ്രപ്രദേശ്, തെലങ്കാന മുഖ്യമന്ത്രിമാരുടെ ദുരിതാശ്വാസ നിധിയിലേക്കാണ് 5 ലക്ഷം രൂപ വീതം സിന്ധു സംഭാവന ചെയ്തിരിക്കുന്നത്.
നേരത്തെ, ദക്ഷിണേന്ത്യന് സൂപ്പര് സ്റ്റാര് പവന് കല്യാണും പ്രതിരോധ പ്രവര്ത്തനങ്ങള്ക്ക് സംഭാവന ചെയ്ത് രംഗത്തെത്തിയിരുന്നു. 2 കോടി രൂപയാണ് പവന് സംഭാവന ചെയ്തത്. പ്രധാനമന്ത്രിയുടെ ദുരിതാശ്വാസ നിധിയിലേക്ക് 1 കോടി രൂപയും ആന്ധ്രാ-തെലങ്കാന മുഖ്യമന്ത്രിമാരുടെ ദുരിതാശ്വാസ നിധിയിലേക്ക് 50 ലക്ഷം രൂപ വീതവുമാണ് താരം സംഭാവന ചെയ്തത്.
ഗുസ്തി താരം ബജ്റംഗ് പുനിയയും കൊറോണ വൈറസിനെ നേരിടാന് ധന സഹായവുമായി രംഗത്തെത്തിയിരുന്നു. റെയില്വേ ഉദ്യോഗസ്ഥനുമ കൂടിയായ പുനിയ തന്റെ ആറ് മാസത്തെ ശമ്പളമാണ് സംഭാവനയായി നല്കിയത്. എംപിയും മുന് ക്രിക്കറ്റ് താരവുമായ ഗൗതം ഗംഭീര് തന്റെ വികസന ഫണ്ടില് നിന്ന് 50 ലക്ഷം രൂപ സംഭാവന ചെയ്തിരുന്നു.