തിരുവനന്തപുരം: കൊറോണ വൈറസിനെ പ്രതിരോധിക്കാനായി രാജ്യത്ത് ലോക്ക് ഡൗണ് പ്രഖ്യാപിച്ച സാഹചര്യത്തില് ജനങ്ങള് വീടുകളില് ഒതുങ്ങിയിരിക്കുകയാണ്. ജനങ്ങള് വീടുകളില് കഴിയാന് തുടങ്ങിയതോടെ ഗാര്ഹിക ഉപഭോഗവും വര്ധിച്ചിട്ടുണ്ട്. വേനല്ക്കാലമായതിനാല് എസിയുടേയും ഫാനിന്റേയുമെല്ലാം ഉപഭോഗം വര്ധിച്ചിരിക്കുകയാണ്. ചില കാര്യങ്ങള് അല്പം ശ്രദ്ധിച്ചാല് വൈദ്യുത ഉപഭോഗം കുറയ്ക്കാന് കഴിയും. വൈദ്യുതി ഉപഭോഗം കുറയ്ക്കാന് ശ്രദ്ധിക്കേണ്ട കാര്യങ്ങള് എന്തൊക്കെയാണെന്ന് നോക്കാം.
1. മൊബൈല് ഫോണ് ഇലക്ട്രിക് ടോര്ച്ച്, ലാപ്ടോപ് എന്നിവയെല്ലാം ചാര്ജ് ചെയ്ത ശേഷം ചാര്ജര് ഊരി മാറ്റുകയോ പ്ലഗ് സ്വിച്ച് ഓഫ് ചെയ്യുകയോ വേണം. ടിവി റിമോര്ട്ട് വെച്ച് ഓഫ് ചെയ്താലും കമ്പ്യൂട്ടര് ഷട്ട് ഡൗണ് ചെയ്താലും പ്ലഗ് സ്വിച്ച് ഓഫ് ചെയ്യാന് ശ്രദ്ധിക്കണം.
2. ഇന്ഡക്ഷന് കുക്കര് ഉപയോഗിക്കുമ്പോള് കുറഞ്ഞ വോള്ട്ടേജില് ക്രമീകരിക്കണം.
3. എസി ഉപയോഗിക്കുമ്പോള് ടെംപറേച്ചര് സെറ്റിംഗ് 24 ല് നിര്ത്തണം. ടൈമിംഗ് ഉപയോഗിച്ച് ഉപയോഗ സമയം കുറയ്ക്കണം. എസി പ്രവര്ത്തിക്കുന്ന സമയത്ത് ജനലും കതകും ഇടയ്ക്കിടെ തുറക്കാതിരിക്കുക.
4. ഫ്രിഡ്ജ് പലതവണ തുറക്കുന്നത് ഊര്ജ നഷ്ടത്തിന് കാരണമാകും. പഴക്കമുള്ള ഫ്രിഡ്ജ് അടയ്ക്കുമ്പോള് റബര് ഫ്ളാപ്പ് അടഞ്ഞിരിക്കുന്നുവെന്ന് ഉറപ്പാക്കണം. പുറത്തു നിന്നുള്ള വായു കടന്നാല് വൈദ്യുതി ഉപഭോഗം കൂടും. ആഹാര സാധനങ്ങള് അടച്ച് വേണം ഫ്രിഡ്ജില് സൂക്ഷിക്കാന്. അല്ലെങ്കില് ഈര്പ്പം ഫ്രിഡ്ജിനുള്ളില് വ്യാപിച്ച് കൂടുതല് വൈദ്യുതി നഷ്ടം ഉണ്ടാകും.
5. ലൈറ്റും ഫാനും ആവശ്യത്തിന് മാത്രം ഉപയോഗിക്കുക. മുറിയില് നിന്നും ഇറങ്ങിയാല് ലൈറ്റും ഫാനും ഓഫ് ചെയ്തെന്ന് ഉറപ്പു വരുത്തുക.
6. ഗുണനിലവാരമുള്ള വൈദ്യുതി ഉപകരണങ്ങള് ഉപയോഗിക്കാന് ശ്രദ്ധിക്കുക.
