ടോക്കിയോ: കൊറോണ വൈറസ് വ്യാപനത്തെ തുടർന്ന് മാറ്റിവെച്ച ടോക്കിയോ ഒളിമ്പിക്സ് അടുത്ത വർഷം നടക്കും. ഈ വർഷം നിശ്ചയിച്ച പ്രകാരം തന്നെയാകും അടുത്ത വർഷവും മത്സരങ്ങൾ നടക്കുക. 2021 ജൂലൈ 23 മുതൽ ഓഗസ്റ്റ് 8 വരെയാകും ഒളിമ്പിക്സ് നടക്കുകയെന്ന് അധികൃതർ അറിയിച്ചു.
ഒളിമ്പിക്സ് ഈ വർഷം തന്നെ നടത്തണമെന്ന നിലപാടായിരുന്നു ആദ്യം മുതൽ ജപ്പാൻ സ്വീകരിച്ചത്. എന്നാൽ നിരവധി രാജ്യങ്ങളും കായിക താരങ്ങളും എതിർപ്പ് പരസ്യമായി പ്രകടിപ്പിച്ച് രംഗത്തു വന്നതോടെ ജപ്പാൻ പ്രതിരോധത്തിലാവുകയായിരുന്നു. ലോക മഹായുദ്ധങ്ങളുടെ പശ്ചാത്തലത്തിൽ ഒളിമ്പിക്സ് മത്സരങ്ങൾ ഇതിനു മുൻപ് റദ്ദാക്കിയിട്ടുണ്ടെങ്കിലും ചരിത്രത്തിൽ ഇതാദ്യമായാണ് ഒളിമ്പിക്സ് മാറ്റി വെക്കുന്നത്.
എല്ലാ രാജ്യങ്ങളും ഒരു പോലെ സ്വസ്ഥമാകാതെ ഒളിമ്പിക്സ് നടത്തുന്നതിലർത്ഥമില്ലെന്ന് ജപ്പാൻ പ്രധാനമന്ത്രി ഷിന്‍സോ ആബേ കഴിഞ്ഞ ദിവസം പ്രതികരിച്ചിരുന്നു. ഈ വര്‍ഷം ജൂലൈ 24 മുതല്‍ ആഗസറ്റ് 9 വരെയായിരുന്നു ഒളിമ്പിക്സ് നടത്താൻ നിശ്ചയിച്ചിരുന്നത്.
