കരുതലായി കുഞ്ഞുകരങ്ങള്‍; കൊറോണ പ്രതിരോധ പ്രവര്‍ത്തനങ്ങള്‍ക്ക് തങ്ങളുടെ സമ്പാദ്യം നല്‍കി കരുന്നുകള്‍; വൈറലായി വീഡിയോ

ന്യൂഡല്‍ഹി: കൊറോണ വൈറസിനെ പ്രതിരോധിക്കാനായി രാജ്യം മുഴുവന്‍ ഇന്ന് ഒറ്റക്കെട്ടായി പ്രവര്‍ത്തിക്കുകയാണ്. സര്‍ക്കാരും ഡോക്ടര്‍മാരും നഴ്‌സുമാരുമെല്ലാം കൊറോണ എന്ന മഹാമാരിയെ നേരിടാനുള്ള തീവ്ര ശ്രമത്തിലാണ്. കൊറോണയ്‌ക്കെതിരെയുള്ള പ്രതിരോധ പ്രവര്‍ത്തനങ്ങളില്‍ ജനങ്ങള്‍ തങ്ങളാലാവുംവിധം സഹായങ്ങള്‍ നല്‍കുകയാണ്. അത്തരത്തില്‍ തങ്ങള്‍ സ്വരുക്കൂട്ടിയ പണം ദുരിതാശ്വാസ നിധിയിലേക്ക് സംഭാവന നല്‍കിയ രണ്ടു കുട്ടികളാണ് ഇപ്പോള്‍ സാമൂഹ്യ മാദ്ധ്യമങ്ങളിലെ താരം.

ഏഴും ആറും വയസായ കുട്ടികളാണ് തങ്ങളുടെ സമ്പാദ്യം ദുരിതാശ്വാസ നിധിയിലേക്ക് നല്‍കിയത്. ട്വിറ്റര്‍ ഉപയോക്താവായ മനസ് എന്ന യുവാവാണ് മിസോറാമില്‍ നിന്നുള്ള ഏഴ് വയസുകാരന്റെ ചിത്രങ്ങള്‍ പങ്കുവെച്ചിരിക്കുന്നത്. കുടുക്കയില്‍ സ്വരുക്കൂട്ടി വെച്ച 333 രൂപയാണ് പ്രദേശത്തെ കൊറോണ പ്രതിരോധ പ്രവര്‍ത്തനങ്ങള്‍ക്കായി ഈ മിടുക്കന്‍ നല്‍കിയത്.

ഉമര്‍ ഖാലിദ് എന്നയാളാണ് ആറു വയസുകാരന്‍ പൊലീസ് സ്റ്റേഷനിലെത്തി തന്റെ സമ്പാദ്യം ഏല്‍പ്പിക്കുന്നതിന്റെ വീഡിയോ പങ്കുവെച്ചിരിക്കുന്നത്. 29 സെക്കന്റാണ് വീഡിയോയുടെ ദൈര്‍ഘ്യം. മാസ്‌ക് ധരിച്ച് നില്‍ക്കുന്ന കുട്ടിയും കുടുക്ക പൊട്ടിച്ച് പണം എണ്ണുന്ന പൊലീസുകാരും വീഡിയോയില്‍ ഉണ്ട്.

നിരവധി പേര്‍ ഇതിനോടകം തന്നെ വീഡിയോ കണ്ടു കഴിഞ്ഞു. കുട്ടികളുടെ മനസിലെ നന്മയെ അഭിനന്ദിച്ച് നിരവധി പേരാണ് രംഗത്തെത്തിയത്.

Meet 7-year-old Rommel Lalmuansanga from Kolasib Venglai(Mizoram) , he donated his entire savings of ₹333 to his Village Level Task Forces in this war against the dreaded Covid-19 pandemic.#IndiaFightsCorona pic.twitter.com/xtmX8xOcDW

— Manas 😷 (@JajaborManas) March 31, 2020