ന്യൂഡൽഹി: പഴകുന്തോറും വീര്യം കൂടി വരുന്ന ഇനമാണ് റോയൽ എൻഫീൽഡ് ബൈക്കുകൾ. കൊച്ചു കുട്ടികൾ മുതൽ പ്രായമായവരുടെ വരെ ഇഷ്ട വാഹനം. കാലത്തിന് അനുസരിച്ച് ബുള്ളറ്റ് ബൈക്കുകൾ മാറ്റങ്ങൾക്ക് വിധേയമാകാറുണ്ടെങ്കിലും പുതിയ മോഡലിനെക്കുറിച്ച് കേൾക്കുമ്പോൾ ഇങ്ങനെയും മാറ്റമുണ്ടാകുമോ എന്ന അത്ഭുതത്തിലാണ് ബൈക്ക് പ്രേമികൾ. അതെ, അതൊരത്തിലൊരു മോഡലാണ് റോയൽ ഇൻഫീൽഡ് പുറത്തിറക്കാൻ പോകുന്നത്.
ക്ലാസിക്ക് 500 വിഭാഗത്തിൽ ഉൾപ്പെടുന്ന ‘ഫോട്ടോൺ’ എന്ന ഇലക്ട്രിക് ബൈക്കാണ് റോയൽ എൻഫീൽഡ് അവതരിപ്പിക്കാൻ പോകുന്നത്. യുകെ ആസ്ഥാനമായി പ്രവർത്തിക്കുന്ന ഇലക്ട്രിക് ക്ലാസിക്ക് കാർസാണ് ഫോട്ടോൺ നിർമ്മിക്കുന്നത്. എന്നാൽ ഫോട്ടോൺ ചില്ലറക്കാരനല്ലെന്ന സൂചനയാണ് ലഭിക്കുന്നത്. കാരണം ഫോട്ടോൺ വാങ്ങുന്ന പൈസക്ക് മൂന്ന് ഹാർലി ഡേവിഡ്സൺ സ്ട്രീറ്റ് 750 ബൈക്കുകളും ഒരു കോണ്ടിനെന്റൽ ജിടിയോ ഇന്റർസെപ്റ്റാറോ കൂടി സ്വന്തമാക്കാം എന്നാണ് പറയപ്പെടുന്നത്. കാരണം 19 ലക്ഷം രൂപയാണ് ഫോട്ടോണിന് വില പ്രതീക്ഷിക്കുന്നത്.
2.5 kWh Li-ion LG കെം ബാറ്ററികളാണ് വാഹനത്തിൽ ഉപയോഗിക്കുക. 13 kW വാട്ടർ കൂൾഡ് ഇലക്ട്രിക് മോട്ടോറാണ് വാഹനത്തിന് കരുത്ത് പകരുക. 48 മുതൽ 80 കിലോ മീറ്റർ വരെ വേഗം കൈവരിക്കാൻ 6 സെക്കൻഡ് മതിയെന്നാണ് കമ്പനി അവകാശപ്പെടുന്നത്. 112 കിലോ മീറ്ററാണ് പരമാവധി വേഗം. ഫുൾ ചാർജിൽ 128 മുതൽ 160 കിലോ മീറ്റർ വരെ സഞ്ചരിക്കാമെന്നതും ഫോട്ടോണിന്റെ പ്രത്യേകതയാണ്. ഫുൾ ചാർജ് ചെയ്യാൻ 90 മിനിറ്റുകൾ മതിയാകും.
37 mm ടെലിസ്കോപിക് ഫ്രണ്ട് ഫോർക്കുകളും പിന്നിൽ ട്വിൻ ഷോക്ക് അബ്സോർബർകളും തന്നെയാണ് ഫോട്ടോണിനും നൽകിയിരിക്കുന്നത്. മുന്നിൽ 280 mm, പിന്നിൽ 240 mm ഡിസ്ക് ബ്രേക്കുകളുമാണ് വാഹനത്തെ നിയന്ത്രിക്കുക.
