ന്യൂഡല്ഹി: കൊറോണ വൈറസ് വ്യാപനം തടയുന്നതിനായി രാജ്യത്ത് ലോക്ക് ഡൗണ് പ്രഖ്യാപിച്ചിരിക്കുന്നതിനാല് വാഹനത്തിന്റെ സൗജന്യ സര്വ്വീസിനും വാറണ്ടിയ്ക്കും രണ്ടു മാസത്തെ സമയം നല്കി ഫോര്ഡ് ഇന്ത്യ. ലോക്ക് ഡൗണ് പ്രഖ്യാപിച്ചിരിക്കുന്നതിനാല് രാജ്യത്തെ ഷോറൂമുകളും ഡീലര്ഷിപ്പുകളും അടഞ്ഞു കിടക്കുന്നത് കണക്കിലെടുത്താണ് ഇളവ് നല്കാന് തീരുമാനിച്ചതെന്ന് ഫോര്ഡ് ഇന്ത്യാ അറിയിച്ചു.
മാര്ച്ച് 15 മുതല് 30 വരെയുള്ള കാലയളവില് വാറണ്ടി അവസാനിക്കുകയോ സര്വ്വീസ് നഷ്ടമാകുകയോ ചെയ്യുന്ന വാഹനങ്ങള്ക്ക് ജൂണ് 30 വരെ വാറണ്ടി നീട്ടി നല്കാനും സൗജന്യമായി സര്വ്വീസ് ചെയ്ത് നല്കാനുമുള്ള സൗകര്യമാണ് ഉപഭോക്താക്കള്ക്കായി കമ്പനി ഒരുക്കിയിരിക്കുന്നത്.
പുതിയ ഉപഭോക്താക്കള്ക്കായി പ്രൈസ് പ്രൊട്ടക്ഷന് സ്കീമും ഫോര്ഡ് ഒരുക്കുന്നുണ്ട്. ഏപ്രില് 30 ന് മുന്പ് വാഹനം ബുക്ക് ചെയ്യുന്നവര്ക്ക് ബുക്കിംഗ് സമയത്തെ വിലയില് തന്നെ വാഹനം നല്കും. വാഹനം ഡെലിവറി ചെയ്യുന്ന സമയത്ത് വില വര്ധനവ് ഉണ്ടെങ്കിലും ഇത് ഉപഭോക്താക്കളെ ബാധിക്കില്ല.
ഡീലര്ഷിപ്പുകളും സര്വ്വീസ് സ്റ്റേഷനുകളും അടച്ചിട്ടിരിക്കുകയാണെങ്കിലും ഫോര്ഡിന്റെ 24 മണിക്കൂര് കസ്റ്റമര് സര്വ്വീസ് ലഭ്യമാക്കിയിട്ടുണ്ട്. റോഡ്സൈഡ് അസിസ്റ്റന്സ് സൗകര്യവും ഫോര്ഡ് ഉപഭോക്താക്കള്ക്കായി ഒരുക്കിയിട്ടുണ്ട്.
