ന്യൂഡൽഹി: ലോകത്തെ ഏറ്റവും സുരക്ഷിതമായ വാഹനം ഏതെന്ന ചോദ്യത്തിന് ഇതുവരെ ഒരു ഉത്തരം മാത്രമേ ഉണ്ടായിരുന്നുള്ളു- അമേരിക്കൻ പ്രസിഡന്റ് ഡൊണാൾഡ് ട്രംപിന്റെ ‘ബീസ്റ്റ്’. റോക്കറ്റ് ആക്രമണത്തെയും വെടിയുണ്ടകളെയും ചെറുക്കും എന്നതാണ് ബീസ്റ്റിന്റെ പ്രത്യേകത. എന്നാൽ ഈ ശ്രേണിയിലേക്ക് ഇതാ മറ്റൊരു വാഹനം കൂടി കടന്നു വന്നിരിക്കുന്നു. ഇൻകാസ് ലിങ്കൺ നാവിഗേറ്റർ എസ് യു വി.
യുദ്ധങ്ങൾക്കും മറ്റും ഉപയോഗിക്കുന്ന വാഹനങ്ങളുടെ നിർമ്മാണം നടത്തുന്ന, കാനഡ ആസ്ഥാനമായി പ്രവർത്തിക്കുന്ന ഇൻകാസ് ആണ് സുരക്ഷക്ക് ഏറെ പ്രാധാന്യം നൽകുന്ന പുതിയ എസ് യു വി പുറത്തിറക്കിയിരിക്കുന്നത്. ബിആർ6 സുരക്ഷ നൽകുന്ന വലിയ ചക്രങ്ങൾ തന്നെയാണ് വാഹനത്തെ കാഴ്ച്ചയിൽ ആകർഷകമാക്കുന്നത്. 7.62 NATO (7.62 mm x 51 mm) ബുള്ളറ്റുകളോ അല്ലെങ്കിൽ .308 Wincheater FMJ എന്നിവ ഉപയോഗിച്ചുള്ള ആക്രമണങ്ങളെയോ വാഹനം ഫലപ്രദമായി ചെറുക്കുമെന്നാണ് കമ്പനി അവകാശപ്പെടുന്നത്. ഇതിനു പുറമെ രണ്ട് DM 51 ഗ്രനേഡുകൾ ഉപയോഗിച്ചുള്ള ആക്രമണത്തെയും ഈ എസ് യു വി പ്രതിരോധിക്കും.
ബോഡി പാനലുകൾ കാഠിന്യമേറിയ സ്റ്റീൽ ഉപയോഗിച്ചാണ് നിർമ്മിച്ചിരിക്കുന്നത്. വാഹനത്തിന്റെ മുകൾ ഭാഗവും താഴ് ഭാഗവും എഞ്ചിന്റെ വശങ്ങളും ഉൾപ്പെടെ സ്റ്റീൽ കവചത്താൽ സുരക്ഷിതമാണ്. ബുള്ളറ്റ് പ്രൂഫ് ഗ്ലാസുകളാണ് വാഹനത്തിന് നൽകിയിരിക്കുന്നത് എന്നതാണ് മറ്റൊരു സവിശേഷത. അത്യാധുനികമായ സസ്പെൻഷൻ, കേടുപാട് സംഭവിച്ചാലും സഞ്ചാര യോഗ്യമായ ടയറുകൾ, അടിയന്തിര ഘട്ടത്തിൽ ഉപയോഗിക്കാവുന്ന ലൈറ്റുകളും മറ്റ് സംവിധാനങ്ങളും ഇൻകാസ് ലിങ്കൺ നാവിഗേറ്റർ എസ് യു വിയെ സാധാരണ വാഹനങ്ങളിൽ നിന്നും വേറിട്ടതാക്കുന്നു.
3.5 ലിറ്റർ ട്വിൻ-ടർബോ ഇക്കോ ബൂസ്റ്റ് V6 എൻജിനാണ് വാഹനത്തിന് കരുത്തേകുന്നത്. 450 എച്ച്പി കരുത്തും 691 എൻഎം ടോർക്കും എഞ്ചിൻ ഉത്പ്പാദിപ്പിക്കും. ഓൾ വീൽ ഡ്രൈവ് നൽകുന്ന വാഹനത്തിൽ ആറ് വ്യത്യസ്ത ഡ്രൈവിംഗ് മോഡുകളാണുള്ളത്. സുരക്ഷക്ക് പുറമെ ആഡംബരത്തിലും കുറവ് വരാതിരിക്കാൻ കമ്പനി ശ്രദ്ധിച്ചിട്ടുണ്ട്. അഡാപ്റ്റീവ് ക്രൂയിസ് കൺട്രോൾ, എൽഇഡി ഹെഡ് ലാമ്പുകൾ, പാർക്ക് അസിസ്റ്റ്, 360 ഡിഗ്രി ലെയ്ൻ കീപ്പിംഗ് സിസ്റ്റം എന്നിവയും ഈ വാഹനത്തിലുണ്ട്.
വാഹനത്തിന്റെ വില സംബന്ധിച്ച് കൂടുതൽ വിവരങ്ങൾ ലഭ്യമായിട്ടില്ല. എന്നാലും, സാധാരണ ഇൻകാസ് ലിങ്കൺ എസ് യു വികളുടെ വില ഏകദേശം 84,925 യുഎസ് ഡോളറാണ്. അതായത് ഏകദേശം 64.5 ലക്ഷം രൂപ.
