ലിസ്ബൺ: ലോക്ക് ഡൗണ്‍ നിർദ്ദേശങ്ങൾ ലംഘിച്ച് സുഹൃത്തുക്കള്‍ക്കൊപ്പം പരിശീലനം നടത്തിയ സൂപ്പർ താരം ക്രിസ്റ്റിയാനോ റൊണാള്‍ഡോക്ക് പോര്‍ച്ചുഗീസ് പ്രാദേശിക ആരോഗ്യ സെക്രട്ടറിയുടെ മുന്നറിയിപ്പ്. റൊണാള്‍ഡോയ്‌ക്ക് പ്രത്യേക അധികാരമോ അവകാശമോ ആരും നൽകിയിട്ടില്ലെന്നും മറ്റുള്ളവർക്ക് മാതൃകയാകേണ്ട വ്യക്തിയാണ് റൊണാൾഡോ എന്നും മദെയ്‌റയിലെ ആരോഗ്യ സെക്രട്ടറിയായ പെഡ്രോ റാമോസ് വ്യക്തമാക്കി.
‘പരിശീലനം നടത്താൻ റൊണാൾഡോക്ക് പ്രത്യേക അനുമതി നൽകിയിട്ടില്ല. എല്ലാവരും ഒരുപോലെയാണ് മഹാമാരിയെ നേരിടുന്നത്. ലോകത്തിലെ തന്നെ മികച്ച താരമായ അദ്ദേഹം മറ്റുള്ളവർക്ക് മാതൃകയാക്കേണ്ട സമയമാണിത്’. റാമോസ് പറഞ്ഞു. അതേസമയം, തുടര്‍ന്നും ലോക്ക് ഡൗണ്‍ ലംഘനങ്ങളുണ്ടായാല്‍ മതിയായ ബലം പ്രയോഗിക്കേണ്ടി വരുമെന്നും പെഡ്രോ റാമോസ് മുന്നറിയിപ്പ് നല്‍കിയിട്ടുണ്ട്.
മദെയ്‌റ നാഷണൽ സ്റ്റേഡിയത്തിൽ പരിശീലനം നടത്തുന്ന റൊണാൾഡോയുടെ ചിത്രങ്ങൾ വലിയ രീതിയിൽ പ്രചരിച്ചിരുന്നു. ഇതോടെയാണ് വിഷയത്തിൽ ആരോഗ്യ വിഭാഗം അധികൃതർ നേരിട്ട് ഇടപെട്ടിരിക്കുന്നത്.
