മുംബൈ : കൊറോണ പ്രതിരോധത്തിനായി രാജ്യത്തെ വാഹന നിർമാതാക്കളെല്ലാംസർക്കാർ സംവിധാനങ്ങളെ സഹായിക്കാൻ തങ്ങളാൽ ആവുന്ന രീതിയിൽ ഉള്ള പ്രവർത്തനങ്ങൾ ചെയ്യുകയാണ്. വെന്റിലേറ്ററും, ഫേസ് മാസ്കും , എന്തിന് സാനിറ്റയിസർ വരെ പുറത്തിറക്കി കഴിഞ്ഞു കമ്പനികൾ. ഇപ്പോഴിതാ പുതിയൊരു ചുവടുവെപ്പുമായി എത്തുകയാണ് ഇരുചക്ര വാഹന നിർമാതാക്കളായ ഹീറോ. ജീവൻ രക്ഷാ സംവിധാനങ്ങൾ എല്ലാം ഉൾക്കൊള്ളിച്ചുള്ള മൊബൈൽ ബൈക്ക് ആംബുലൻസ് ആണ് ഹീറോ അവതരിപ്പിച്ചിരിക്കുന്നത്.
150 സിസിയും അതിനുമുകളിലും എഞ്ചിൻ ശേഷിയുള്ള ഹീറോ ബൈക്കുകളാണ് കമ്പനി മൊബൈൽ ആംബുലൻസുകൾ ആക്കിയിരിക്കുന്നത്. ഒരാളെ കിടത്താനുള്ള സൗകര്യമാണ് വാഹനത്തിന്റെ ഏറ്റവും വലിയ പ്രത്യേകത. ഓക്സിജൻ സിലിണ്ടർ, പ്രഥമശുശ്രൂഷ കിറ്റ്, ഫയർ എക്സ്റ്റിംഗ്യൂഷർ, ഒരു സൈറൺ എന്നിവ അടക്കം ആവശ്യമായ എല്ലാ അടിയന്തിര ഉപകരണങ്ങളും മെഡിക്കൽ കിറ്റുകളും വാഹനത്തിൽ ഉൾപ്പെടുത്തിയിട്ടുണ്ട്.
ഇപ്പോൾ രാജ്യത്ത് ഉടനീളം 60 മൊബൈൽ ബൈക്ക് ആംബുലൻസ് സംഭാവനയായി നൽകുമെന്ന് ഹീറോ അറിയിച്ചിട്ടുണ്ട്. ഇതിന് പുറമെ 100 കോടി രൂപയും കമ്പനി സംഭാവനയായി പ്രഖ്യാപിച്ചിട്ടുണ്ട്.
