ലോകത്തിലെ ഏറ്റവും കൂടുതൽ വിറ്റഴിക്കുന്ന സ്പോർട്സ് കാറായ ഫോർഡ് മസ്റ്റാംഗിന് 56 വയസ്. 1964 ഏപ്രിൽ 17 ന് ഫോർഡ് അവതരിപ്പിച്ച മസ്റ്റാംഗിന്റെ ആറ് തലമുറകള് ഇതിനോടകം ഇറങ്ങിയിട്ടുണ്ട്. മിഷിഗനിലെ ഫ്ലാറ്റ് റോക്കിലുള്ള ഫോർഡിന്റെ അസംബ്ലി പ്ലാന്റിലാണ് മസ്റ്റാംഗിന്റെ ന൪മ്മാണം.
2019 ൽ ആഗോളതലത്തിൽ മസ്റ്റാംഗിന്റെ 102,090 യൂണിറ്റുകൾ ഫോർഡ് വിറ്റു. ജർമ്മനിയിൽ വിൽപ്പന 33 ശതമാനം ഉയർന്നു. പോളണ്ടിലെ വിൽപ്പന 50 ശതമാനമാണ് ഉയർന്നത്. ഫ്രാൻസിൽ അവ ഇരട്ടിയായി. യൂറോപ്പിൽ, വിൽപ്പനയിൽ 3 ശതമാനമാണ് വർധനയുണ്ടായത്.
നാലു സ്പീഡ് മാനുവൽ ട്രാൻസ്മിഷൻ അല്ലെങ്കിൽ മൂന്നു സ്പീഡ് ഓട്ടോമാറ്റിക് ‘ക്രൂയിസ് ഒ മാറ്റിക്’ ട്രാൻസ്മിഷൻ കൂടാതെ ഒരു 260 ക്യുബിക് ഇഞ്ച് വി -8 എഞ്ചിൻ ഓപ്ഷനുകളിലായിരുന്നു ആദ്യ മസ്റ്റാംഗ് വിപണിയിലെത്തിയത്. ഓരോ പുതിയ തലമുറ മോഡലും പുറത്തിറക്കുമ്പോള് ഫോ൪ഡ് വാഹനത്തിൽ മാറ്റങ്ങള് വരുത്തി.
ഇപ്പോള് വിപണിയിലുള്ളത് വാഹനത്തിന്റെ ആറാം തലമുറയാണ്. 2015 ൽ മസ്റ്റാംഗിന്റെ 50-ാം പിറന്നാളിനോടനുബന്ധിച്ച് ഇറക്കിയ മോഡലാണിത്. പുതിയ മസ്റ്റാംഗിൽ ഒരു സ്വതന്ത്ര റിയർ സസ്പെൻഷൻ, പുഷ് സ്റ്റാർട്ട് ടെക്നോളജി, 300 + എച്ച്പി ടർബോചാർജ്ജ്ഡ് 2.3 ലിറ്റർ ഇക്കോബോസ്റ്റ് ഫോർ സിലിണ്ടർ എൻജിൻ ഓപ്ഷൻ എന്നിവയും ഉൾപ്പെടുത്തിയിരുന്നു.
