മുംബൈ : ലോകത്തെ തന്നെ ഏറ്റവും ജനപ്രിയമായ മിനി എസ്യുവി സുസുക്കി ജിമ്നി വിപണിയിൽ എത്തിയിട്ട് 50 വർഷം തികയുന്നു. 1970 ഏപ്രിലിലാണ് കുഞ്ഞൻ ഓഫ്റോഡർ എസ്യുവി അരങ്ങേറ്റം കുറിക്കുന്നത്. ഈ കാലയളവിനുള്ളിൽ 194 നഗരങ്ങളിലായി 2.85 ദശലക്ഷം യൂണിറ്റ് ജിമ്നി വിറ്റഴിക്കാനും സാധിച്ചു.
ഇക്കഴിഞ്ഞ ഡൽഹി ഓട്ടോ എക്സ്പോയിലാണ് വാഹനത്തെ ഇന്ത്യയിൽ അവതരിപ്പിച്ചത്. മുൻപ് ജിമ്നിയെ പ്രാദേശിക വിപണിയിൽ അവതരിപ്പിക്കുന്നില്ല എന്ന് പറഞ്ഞ മാരുതി പിന്നീട് ഇന്ത്യൻ വിപണിയിലിറക്കാൻ തീരുമാനിക്കുകയായിരുന്നു. അടുത്ത വർഷത്തോടെ ജിമ്നി ഇന്ത്യൻ നിരത്തുകളിൽ എത്തുമെന്നാണ് റിപ്പോർട്ടുകൾ.
പുതിയ ജിംനി ഒരു ലാഡർ ഫ്രെയിം ചേസിസ് അടിസ്ഥാനമാക്കിയുള്ളതാണ്. യഥാർത്ഥ എസ്യുവിയിൽ പ്രതീക്ഷിക്കുന്ന എല്ലാ ഘടകങ്ങളും വാഹനത്തിൽ ഉൾപ്പെടുത്തിയിട്ടുണ്ട്. ജിംനിക്ക് ഒരു പാർട്ട് ടൈം ഫോർവീൽ ഡ്രൈവ് സജ്ജീകരണവും 3 ലിങ്ക് ആക്സിൽ സസ്പെൻഷനും ലഭിക്കുന്നു. കമ്പനിയുടെ പുതിയ കെ-സീരീസ് 1.5 ലിറ്റർ നാല് സിലിണ്ടർ പെട്രോൾ എഞ്ചിനിലാണ് വാഗ്ദാനം ചെയ്യുന്നത്. അത് മികച്ച പെർഫോമെൻസും ഇന്ധനക്ഷമതയുമാണ് നൽകുന്നത്.
രണ്ട് എസ്ആർഎസ് എയർബാഗുകൾ, എബിഎസ് വിത്ത് സ്റ്റെബിലിറ്റി കൺട്രോൾ പ്രോഗ്രാം. സുസുക്കി സേഫ്റ്റി സപ്പോർട്ട് എന്നറിയപ്പെടുന്ന പുതിയ സുരക്ഷാ സ്യൂട്ടും വാഹനത്തിൽ ഉൾപ്പെടുത്തിയിട്ടുണ്ട്.