മോഹൻ ബഗാനെ ഐ ലീഗ് ചാമ്പ്യൻമാരാക്കിയ സ്പാനിഷ് കോച്ച് കിബു വികുനയെ കേരള ബ്ലാസ്റ്റേഴ്സിന്റെ അടുത്ത സീസണിലേക്കുള്ള പരിശീലകനായി നിയമിച്ചു. ബ്ലാസ്റ്റേഴ്സ് തന്നെയാണ് സാമൂഹിക മാദ്ധ്യമങ്ങളിലൂടെ ഇക്കാര്യം അറിയിച്ചത്. മു൯ കോച്ച് എൽക്കോ ഷട്ടോരിയെ ഇന്ന് രാവിലെയാണ് ക്ലബ് പുറത്താക്കിയത്. മണിക്കൂറുകൾക്കുള്ളിൽ തന്നെ പുതിയ പ്രഖ്യാപനവുമെത്തി.
18 വർഷത്തിലധികം പരിശീലന പരിചയമുള്ള മുൻ സ്പാനിഷ് പ്രൊഫഷണൽ ഫുട്ബോൾ കളിക്കാരനാണ് കിബു. തന്റെ സ്വദേശമായ സ്പെയിനിൽ നിന്നും പോളണ്ടിൽ നിന്നുമുള്ള നിരവധി ക്ലബുകളുമായി വിശാലവും സമ്പന്നവുമായ അനുഭവമുണ്ട് അദ്ദേഹത്തിന്. 16 വയസുള്ളപ്പോൾ കിബു തന്റെ ആദ്യ ടീമിനെ പരിശീലിപ്പിച്ചു. 48 കാരനായ അദ്ദേഹം, മോഹൻ ബാഗനുമായുള്ള ഒരു വർഷത്തെ പ്രവർത്തനത്തിന് ശേഷമാണ് ബ്ലാസ്റ്റേഴ്സിൽ ക്യാമ്പിലെത്തുന്നത്.
കേരള ബ്ലാസ്റ്റേഴ്സിൽ ചേരുന്നതിൽ എനിക്ക് അതിയായ സന്തോഷമുണ്ടെന്ന് കിബു വികുന പ്രതികരിച്ചു. ഐഎസ്എല്ലിന്റെ മികച്ച ടീമുകളിലൊന്നിനെ പരിശീലിപ്പിക്കാനുള്ള അവസരം ലഭിക്കുന്നത് ഒരു വലിയ പദവിയാണ്. ഇത് വളരെ ആവേശകരമായ വെല്ലുവിളിയാണ്. ഞങ്ങൾ ഒരു മികച്ച ശൈലിയിലുള്ള ഫുട്ബോൾ കളിക്കാനും മികച്ച ഫലങ്ങൾ നേടാനും ഞങ്ങളുടെ പരമാവധി ചെയ്യാൻ പോകുന്നു. കേരള ബ്ലാസ്റ്റേഴ്സിന്റെ എക്കാലത്തെയും ഊർജ്ജസ്വലവും പിന്തുണയുമുള്ള ആരാധകരെയോ൪ത്ത് ഞങ്ങൾ അഭിമാനിക്കുന്നുവെന്നും അദ്ദേഹം പറഞ്ഞു.
കിബു ഒരു മികച്ച പ്രൊഫഷണലും അതിശയകരമായ വ്യക്തിയുമാണെന്ന് ബ്ലാസ്റ്റേഴ്സ് സ്പോ൪ട്ടിംഗ് ഡയറക്ട൪ കരോലിസ് സ്കി൯കിസ് പ്രതികരിച്ചു. ഒരുമിച്ച് ഒരു വിജയകരമായ ജോലി ചെയ്യാനും ഭാവിയിലേക്കുള്ള നിശ്ചിത ലക്ഷ്യങ്ങൾ കൈവരിക്കാനും കൂടുതൽ ഉയരങ്ങളിലേക്ക് വളരാനും ക്ലബിനെ സഹായിക്കാനാകുമെന്ന് എനിക്ക് ഉറപ്പുണ്ടെന്നും സ്കി൯കിസ് പറഞ്ഞു.
