മുംബൈ: ഇന്ത്യൻ ടീമിലെ എക്കാലത്തെയും മികച്ച അഞ്ച് താരങ്ങളെ തെരഞ്ഞെടുത്ത് ‘ഹിറ്റ്മാൻ’ രോഹിത് ശർമ്മ. ഇൻസ്റ്റാഗ്രാമിൽ ഹർഭജൻ സിംഗുമായി നടത്തിയ ലൈവ് ചാറ്റിലാണ് രോഹിത് തന്റെ ഇഷ്ട താരങ്ങളെ വെളിപ്പെടുത്തിയത്.
സൗരവ് ഗാംഗുലി, സച്ചിന്‍ ടെന്‍ഡുല്‍ക്കര്‍, രാഹുല്‍ ദ്രാവിഡ്, വിവിഎസ് ലക്ഷ്മണ്‍, വിരേന്ദര്‍ സേവാഗ് എന്നിവരെയാണ് രോഹിത് ശര്‍മ തെരഞ്ഞെടുത്തത്. എന്നാല്‍, സുനില്‍ ഗവാസ്‌കര്‍, ഗുണ്ടപ്പ വിശ്വനാഥ് എന്നിവരുടെ പേരുകള്‍ രോഹിത് പരാമർശിച്ചില്ല എന്നതും ശ്രദ്ധേയമായി.
സച്ചിന്റെ പ്രകടനങ്ങള്‍ കണ്ടാണ് താൻ വളര്‍ന്നത്. 2002ൽ ഇംഗ്ലണ്ടിനെതിരെ നടന്ന പരമ്പരയില്‍ രാഹുല്‍ ദ്രാവിഡ് എത്ര സെഞ്ചുറികളാണ് നേടിയതെന്ന് രോഹിത് ആശ്ചര്യപൂർവം പറയുന്നു.
ബൗളര്‍മാരുടെ ആത്മവിശ്വാസം തല്ലിക്കെടുത്താന്‍ കെല്‍പ്പുളള ബാറ്റ്സ്മാൻ എന്നാണ് അദ്ദേഹം സേവാഗിനെ വിശേഷിപ്പിച്ചത്.
ഇവരെ കൂടാതെ സൗരവ് ഗാംഗുലി, വിവിഎസ് ലക്ഷ്മണ്‍ എന്നിവരും തന്റെ പ്രിയ താരങ്ങളാണെന്ന് രോഹിത് പറയുന്നു. താൻ ക്രിക്കറ്റ് കളി കണ്ട് വളരുമ്പോള്‍ സജീവമായിരുന്ന കളിക്കാരെയാണ് പട്ടികയില്‍ ഉള്‍പ്പെടുത്തിയിരിക്കുന്നതെന്ന് രോഹിത് വ്യക്തമാക്കി. വരും വര്‍ഷങ്ങളില്‍ നടക്കാനിരിക്കുന്ന മൂന്ന് ലോകകപ്പുകളില്‍ രണ്ടെണ്ണമെങ്കിലും സ്വന്തമാക്കുകയാണ് തന്റെ ലക്ഷ്യമെന്നും രോഹിത് വ്യക്തമാക്കി.
