ബെയ്ജിംഗ്: ശ്വാസതടസം മൂലം ഡോക്ടറെ കാണാനെത്തിയ യുവാവിന്റെ ശ്വാസകോശത്തില് നിറയെ വിരകള്. ചൈനയിലാണ് സംഭവം. മാസങ്ങളായി തുടരുന്ന ശ്വാസ തടസവും അതു സംബന്ധിച്ച പ്രയാസങ്ങളുമായി ആശുപത്രിയിലെത്തിയ വാങ് എന്ന യുവാവിന്റെ ശ്വാസകോശത്തില് നിന്നാണ് വിരകളെ കണ്ടെത്തിയത്. ഡോക്ടര്മാര് വിശദമായി പരിശോധിച്ച ശേഷം സിടി സ്കാനിന് വിധേയനായതോടെയാണ് ജീവനുള്ള വിരകളെ കണ്ടെത്തിയത്. സ്ഥിരമായി ജീവനുള്ള ഒച്ചുകളേയും പാമ്പിനേയും ഭക്ഷിച്ചിരുന്നയാളാണ് വാങ്.
സ്ഥിരമായി വേവിക്കാത്ത മാംസ വിഭവങ്ങളും വൃത്തിഹീനമായ വെള്ളവും കുടിക്കുന്നവരിലാണ് ഇത്തരം അണുബാധ ഉണ്ടാവുകയെന്ന് ഡോക്ടര്മാര് പറയുന്നു. പാരാഗോണിമിയായിസ് എന്നാണ് ഈ രോഗാവസ്ഥയുടെ പേര്. വേവിക്കാതെ കഴിക്കുന്ന കടല് വിഭവങ്ങളാണ് ഈ രോഗാവസ്ഥയ്ക്ക് പ്രധാന കാരണം.
ഒച്ചുകളും ക്രേഫിഷുകളുമാണ് വാങിന്റെ പതിവ് ഭക്ഷണ രീതി. പാമ്പിന്റെ പിത്താശയവും ഇയാള് കഴിച്ചിരുന്നു. മതിയായ രീതിയില് വേവിക്കാതെയായിരുന്നു ഇയാള് ഈ ഭക്ഷണമെല്ലാം കഴിച്ചിരുന്നത്. ഇവയില് ഉണ്ടായിരുന്ന വിരകളുടെ മുട്ടയാണ് അണുബാധയ്ക്ക് കാരണമായതെന്നാണ് ഡോക്ടര്മാര് പറയുന്നത്.
ചൈനയിലെ പല മാര്ക്കറ്റുകളിലും വേവിക്കാത്ത കടല് വിഭവങ്ങളും പാമ്പിന്റെ ഇറച്ചിയും മറ്റും ലഭിക്കാറുണ്ട്. കൊറോണ വൈറസ് വ്യാപനത്തെ തുടര്ന്ന് അവയുടെ വിപണനം നിര്ത്തിവെച്ചിരുന്നു.
