ന്യൂഡല്‍ഹി: കൊറോണക്ക് ശേഷമുള്ള ലോകം എന്തായിരിക്കുമെന്ന് എല്ലാവര്‍ക്കും വ്യക്തമായിരിക്കുന്നു. പ്രതിസന്ധികള്‍ക്കിടയില്‍ ഭീകരപ്രവര്‍ത്തനത്തിന് ആക്കം കൂട്ടുന്ന പാകിസ്താന് ശക്തമായ തിരിച്ചടി നല്‍കുമെന്ന് ബിജെപി ദേശീയ ജനറല്‍ സെക്രട്ടറി രാം മാധവ്. ഇത്തരക്കാരെ എങ്ങനെ നേരിടണമെന്ന് ഇന്ത്യക്ക് നന്നായി അറിയാമെന്നും രാം മാധവ് മുന്നറിയിപ്പ് നല്‍കി. കൊറോണക്ക് ശേഷമുള്ള നവലോകക്രമത്തില്‍ ചൈനയെ പോലെ പാകിസ്താനും എവിടെ എത്തുമെന്ന് കാത്തിരുന്നു കാണാമെന്നും രാംമാധവ് പറഞ്ഞു.
കൊറോണക്ക് തുടക്കമിട്ട ചൈനയുടെ നയങ്ങളെ ലോകം തിരിച്ചറിഞ്ഞു കഴിഞ്ഞു. അന്താരാഷ്‌ട്ര സമൂഹം ചൈനയെ കയ്യൊഴിയുന്ന സാഹചര്യമാണ്. അവിടെ നിന്നും വലിയതോതിലുള്ള മൂലധനത്തിന്റെ പിന്‍വലിക്കലാണ് കമ്പനികള്‍ നടത്തുന്നത്. ഇന്ത്യയെയാണ് ഏവര്‍ക്കും വിശ്വാസം. ദേശീയ വാര്‍ത്താ ഏജന്‍സിക്ക് നല്‍കിയ അഭിമുഖത്തിലാണ് രാംമാധവ് അഭിപ്രായപ്പെട്ടത്.
ഇന്ത്യയില്‍ ഇസ്ലാമോഫോബിയയാണെന്ന വാദം ബിജെപി നേതാവ് തള്ളി. ‘തബ് ലീഗ് ജമാ അത്തിന്റെ പ്രവൃത്തിയുടെ പേരില്‍ മുസ്ലീം സമൂഹത്തെ ഒന്നായി കുറ്റപ്പെടുത്തിയിട്ടില്ല. അങ്ങിനെ ചെയ്യുന്നത് ആ സമൂഹത്തിനും രാജ്യത്തിന് പൊതുവായും ഗുണം ചെയ്യില്ല. പ്രധാനമന്ത്രി നരേന്ദ്രമോദിക്ക് എല്ലാ സമൂഹത്തിന്റേയും വ്യാപകമായ പിന്തുണയാണ് ലഭിച്ചുകൊണ്ടിരിക്കുന്നത്. എതിരാളികള്‍ ബുദ്ധിമുട്ടുന്നത് മോദി ഫോബിയ മൂലമാണ് ‘ പ്രതിപക്ഷ ആരോപണങ്ങളെ വിമര്‍ശിച്ചുകൊണ്ട് രാംമാധവ് പറഞ്ഞു.
