വാഷിംഗ്ടണ്: കൊറോണ വൈറസിന്റെ ജനിതക വ്യതിയാനം സംഭവിച്ച ശ്രേണിയെ കണ്ടെത്തി ശാസ്ത്രജ്ഞര്. ആദ്യ ദിവസങ്ങളില് പടര്ന്ന കൊറോണ വൈറസിനേക്കാള് കൂടുതല് സാംക്രമികമാണിത്. യുഎസ് ആസ്ഥാനമായുള്ള ലോസ് അലാമോസ് നാഷണല് ലബോറട്ടറിയുടെ നേതൃത്വത്തിലുള്ള യുഎസ് ശാസ്ത്രജ്ഞരുടെ സംഘമാണ് കണ്ടെത്തലിന് പിന്നില്.
ശാസ്ത്രജ്ഞരുടെ കണ്ടെത്തല് പ്രിപ്രിന്റ് പോര്ട്ടലായ ബയോആര്ക്സ്വില് ശാസ്ത്രലോകത്തിന്റെ വിശകലനത്തിനും അംഗീകാരത്തിനുമായി സമര്പ്പിച്ചിരിക്കുകയാണ്. ജനിതക വ്യതിയാനം സംഭവിച്ച കൊറോണയുടെ പുതിയ വര്ഗത്തെ ഫെബ്രുവരി മാസത്തില് യൂറോപ്പിലാണ് ആദ്യം കണ്ടെത്തുന്നത്. പിന്നീട് അമേരിക്കയുടെ കിഴക്കന് തീരത്തും ഇതിനെ കണ്ടെത്തി. മാര്ച്ച് പകുതിയോടെ ലോകത്തിലെ ഏറ്റവും പ്രബലമായ കൊറോണ വൈറസ് ശ്രേണിയായി തീരുകയായിരുന്നുവെന്നാണ് റിപ്പോര്ട്ടില് പറയുന്നത്. വേഗത്തില് പടരുകയും ആളുകളെ ഇവ രണ്ടാമതും രോഗബാധയ്ക്ക് ഇരയാക്കുന്നുവെന്നും റിപ്പോര്ട്ടില് പറയുന്നു.
മനുഷ്യന്റെ ശ്വസന കോശങ്ങളിലേക്ക് പ്രവേശിക്കാന് കഴിയുന്ന കൊറോണ വൈറസിന്റെ പുറം ഭാഗത്ത് ഉള്ള മുള്ളു പോലെയുള്ള ഭാഗത്തെയാണ് ജനിതക വ്യതിയാനം ബാധിക്കുന്നത്. ഇത്തരത്തില് ജനിതക വ്യതിയാനം സംഭവിച്ച കൊറോണയുടെ മാരകമായ ഈ ശ്രേണിയെ കുറിച്ച് നേരത്തെ തന്നെ വാക്സിന് നിര്മ്മാതാക്കള്ക്ക് മുന്നറിയിപ്പ് നല്കുന്നത് അടിയന്തര പ്രാധാന്യമുണ്ടെന്ന് തോന്നിയതായി ശാസ്ത്രജ്ഞര് വ്യക്തമാക്കി.
ലോകമെമ്പാടുമുള്ള 6000 ല് അധികം കൊറോണ വൈറസ് സ്വീക്വന്സുകളുടെ ഒരു കമ്പ്യട്ടേഷണല് വിശകലനത്തെ അടിസ്ഥാനമാക്കിയാണ് റിപ്പോര്ട്ട് തയ്യാറാക്കിയത്. ജനിതക വ്യതിയാനം സംഭവിച്ച 14 കൊറോണ വര്ഗങ്ങളെ ശാസ്ത്രജ്ഞര് ഇതുവരെ തിരിച്ചറിഞ്ഞിട്ടുണ്ട്.
