മുംബൈ: കൊറോണ വൈറസ് എന്ന മഹാമാരിക്കെതിരെയുള്ള പോരാട്ടത്തിലാണ് രാജ്യത്തെ ജനങ്ങളെല്ലാവരും. ഒരേ മനസോടെയാണ് കൊറോണ വൈറസിനെതിരെ ജനങ്ങള് പോരാടുന്നത്. കൊറോണ പ്രതിരോധ പ്രവര്ത്തനങ്ങള്ക്കായി രാജ്യത്തിന്റെ വിവിധ ഭാഗങ്ങളിലുള്ളവര് സഹായവുമായി രംഗത്തെത്തുന്നുണ്ട്. പാവപ്പെട്ടവനെന്നോ പണക്കാരനെന്നോ വ്യത്യാസമില്ലാതെ തങ്ങളാല് കഴിയുന്ന വിധം സഹായങ്ങള് നല്കുകയാണ് എല്ലാവരും.
അത്തരത്തില് കൊറോണ പ്രതിരോധ പ്രവര്ത്തനങ്ങള്ക്കായി വേറിട്ട രീതിയില് ധനസമാഹരണം നടത്തിയിരിക്കുകയാണ് കബീര് എന്ന കൊച്ചുമിടുക്കന്. മുംബൈ സ്വദേശികളായ കരിഷ്മ, കേശവ് എന്നീ ദമ്പതികളുടെ മകനാണ് ഈ മൂന്നു വയസുകാരന്. കേക്ക് വിറ്റുകിട്ടിയ പണമാണ് കൊറോണ പ്രതിരോധ പ്രവര്ത്തനങ്ങള്ക്കായി മുംബൈ പൊലീസിന് കൈമാറിയത്. കേക്ക് വിറ്റു കിട്ടിയ പണം കൈമാറുന്ന വീഡിയോ ഇതിനോടകം തന്നെ സാമൂഹ്യ മാദ്ധ്യമങ്ങളില് വൈറലായിരിക്കുകയാണ്. മുംബൈ പൊലീസിന്റെ ഔദ്യോഗിക ഇന്സ്റ്റഗ്രാം അക്കൗണ്ടിലാണ് വീഡിയോ പങ്കുവെച്ചിരിക്കുന്നത്.
10,000 രൂപ സമാഹരിച്ചു നല്കണമെന്നായിരുന്നു കബീറിന്റെ ലക്ഷ്യം. എന്നാല് കേക്ക് ഉണ്ടാക്കി വിറ്റതിലൂടെ 50,000 രൂപ കബീറിന് ലഭിച്ചു. മാതാപിതാക്കളും കബീറിനെ സഹായിച്ചു. പൊലീസ് കമ്മീഷണര് പരംബീര് സിംഗിനാണ് കബീര് പണം കൈമാറിയത്. തുകയ്ക്കൊപ്പം പൊലീസ് ഉദ്യോഗസ്ഥര്ക്ക് മധുരപലഹാരങ്ങള് നിറഞ്ഞ ഒരു പെട്ടിയും കബീര് സമ്മാനിച്ചു.
വീഡിയോ പങ്കുവെച്ചതിന് പിന്നാലെ നിരവധി പേര് കബീറിനെ അഭിനന്ദിച്ച് രംഗത്തെത്തി.
