സോള്: കൊറോണ വൈറസ് ബാധ ഭേദമായതിന് ശേഷവും കൊറോണ വൈറസ് പോസിറ്റീവായ തുടരുന്നവരില് നിന്നും മറ്റുള്ളവരിലേക്ക് രോഗം പകരില്ലെന്ന് പഠനം. കൊറിയന് പകര്ച്ച വ്യാധി പ്രതിരോധ കേന്ദ്രത്തിലെ ഗവേഷകരാണ് പഠനം നടത്തിയത്. 285 കൊറോണ രോഗികളില് നടത്തിയ പഠനത്തിലാണ് ഇത് കണ്ടെത്തിയതെന്ന് ഗവേഷകര് വ്യക്തമാക്കി.
കൊറോണ ലക്ഷണങ്ങള് ഇല്ലാതായിട്ടും ഇവരില് വൈറസിന്റെ സാന്നിദ്ധ്യമുണ്ടായിരുന്നു. ഇവരില് നിന്നും ശേഖരിച്ച സാമ്പിളുകളില് വൈറസ് ഉണ്ടായിരുന്നെങ്കിലും അവ നിര്ജീവവും മറ്റുള്ളവര്ക്ക് രോഗം പകര്ത്താന് കഴിവില്ലാത്തവയുമായിരുന്നുവെന്നാണ് ഗവേഷകര് വ്യക്തമാക്കുന്നത്. പുതിയ വിലയിരുത്തലിന്റെ അടിസ്ഥാനത്തില് ദക്ഷിണ കൊറിയയിലെ ലോക്ക് ഡൗണ് നിയന്ത്രണങ്ങളില് കൂടുതല് ഇളവ് നല്കാമെന്നാണ് ഗവേഷകരുടെ അഭിപ്രായം.
പുതിയ പഠനങ്ങള് വന്നതോടെ കൊറോണ ലക്ഷണങ്ങള് പൂര്ണമായും മാറിയ ആളുകളെ തുടര്ന്നും ഐസൊലേഷനില് പാര്പ്പിക്കേണ്ടെന്നാണ് ദക്ഷിണ കൊറിയന് അധികൃതരുടെ നിലപാട്.
വൈറസ് ബാധ സ്ഥിരീകരിക്കാന് നിലവില് ഉപയോഗിക്കുന്ന പിസിആര് ടെസ്റ്റില് നിര്ജീവമായതും അല്ലാത്തതുമായ വൈറസുകളെ തിരിച്ചറിയാന് കഴിയില്ല. വൈറസിലെ ന്യൂക്ലിക് ആസിഡ് മാത്രമാണ് ഇതുവഴി തിരിച്ചറിയാന് കഴിയുന്നത്. അതിനാല് തന്നെ രോഗലക്ഷണങ്ങള് ഇല്ലാത്തവരില് നിര്ജീവമായ വൈറസ് ഘടകങ്ങള് ഉണ്ടെങ്കില് അവര്ക്ക് രോഗമുണ്ടെന്ന് തെറ്റിദ്ധരിക്കേണ്ടി വരുമെന്നാണ് ഗവേഷകര് പറയുന്നത്.
