മുംബൈ: ഐ.പി.എല് മത്സരങ്ങള് മണ്സൂണ് സീസണിന് ശേഷം ഉടന് ആരംഭിക്കുമെന്ന സൂചനയുമായി ബി.സി.സി.ഐ രംഗത്ത്. സിഇഒ രാഹുല് ജോഹ്റിയാണ് നിലവിലെ സാഹചര്യവും മുന്നൊരുക്കങ്ങളും തുടങ്ങിയതായ സൂചന നല്കിയത്. ഇതിനിടെ ഒക്ടോബറിലും നവംബറിലുമായി നടക്കേണ്ടിയിരുന്ന ടി20 ലോകകപ്പ് മാറ്റണോ എന്ന കാര്യം 27-ാം തീയതി ഐ.സി.സി യോഗത്തില് തീരുമാനമാകുമെന്നും ജോഹ്റി വ്യക്തമാക്കി.
ടി20 ലോകകപ്പ് മാറ്റാനുള്ള സാധ്യതയാണ് കൂടുതലെന്നാണ് ബി.സി.സി.ഐ വൃത്തങ്ങള് പറയുന്നത്.വിവിധ രാജ്യങ്ങളുടെ വിസ പ്രശ്നങ്ങളും കൊറോണ അവസ്ഥകളും കണക്കിലെടുത്തുമാത്രമേ ലോകകപ്പിന്റെ കാര്യം തീരുമാനിക്കാനാകൂ. എന്നാല് ഐ.പി.എല്ലില് കളിക്കാന് താല്പ്പര്യമുള്ള വിദേശ താരങ്ങള്ക്ക് വ്യക്തിഗത വിസ ശരിയാക്കിയാല് ഇന്ത്യയിലേക്ക് എത്താമെന്നതാണ് ഒരു അവസരമായി ബി.സി.സി.ഐ കണക്കുകൂട്ടുന്നത്.
ഇതിനിടെ കൊറോണ പ്രോട്ടോക്കോള് അനുസരിച്ച് ഇന്ത്യയിലെത്തുന്ന താരങ്ങള് 14 ദിവസം ക്വാറന്റൈനില് പോകണമെന്നത് മത്സരക്രമത്തെ ബാധിക്കുമോ എന്ന ആശങ്കയും ബി.സി.സി.ഐ അധികൃതര് പങ്കുവച്ചു. മാര്ച്ച് 29ന് ആരംഭിക്കേണ്ടിയിരുന്ന ഐ.പി.എല് ആദ്യം ഏപ്രില് 15ലേക്കും പന്നീട് അനിശ്ചിതകാലത്തേക്കും നീട്ടുകയായിരുന്നു.
