മുംബൈ : ക്രിക്കറ്റ് ഇതിഹാസം സച്ചിൻ ടെണ്ടുൽക്കറും അഞ്ജലിയും ഒന്നായിട്ട് ഇന്ന് 25 വർഷം. രജത ജൂബിലി നിറവിൽ എത്തി നിൽക്കുന്ന ഈ കൂട്ടുകെട്ടിന് ആശംസകൾ നേർന്ന് ക്രിക്കറ്റ് ലോകം ഒന്നടങ്കം രംഗത്തെത്തി.
1995 മെയ് 24നാണ് അഞ്ജലി സച്ചിന്റെ ജീവിത പങ്കാളിയായെത്തുന്നത്. അഞ്ച് വര്‍ഷം നീണ്ട പ്രണയത്തിനൊടുവിൽ ആണ് ഇരുവരും വിവാഹിതരാവുന്നത്. 1990ല്‍ മുംബൈ വിമാനത്താവളത്തില്‍വെച്ചാണ് ഇരുവരും ആദ്യമായി കണ്ടുമുട്ടിയത്.അന്ന് തന്റെ ആദ്യ വിദേശപര്യടനം കഴിഞ്ഞ് സച്ചിന്‍ മുംബൈയില്‍ മടങ്ങിയെത്തിയതായിരുന്നു. മെഡിക്കല്‍ വിദ്യാര്‍ത്ഥിയായിരുന്ന അഞ്ജലി അമ്മയെ കൂട്ടാനായാണ് മുംബൈ വിമാനത്താവളത്തിലെത്തിയത്.
ഗുജറാത്ത് വ്യവസായി ആനന്ദ് മേത്തയുടേയും അന്നാ ബെന്നിന്റെയും മകളാണ് അഞ്ജലി. സച്ചിനേക്കാള്‍ ആറ് വയസുകൂടുതലാണ് അഞ്ജലിക്ക്. ശിശുരോഗവിദഗ്ധയായിരുന്ന അഞ്ജലി വിവാഹത്തിന് ശേഷം കുടുംബത്തിലേക്ക് ഒതുങ്ങുകയായിരുന്നു. രണ്ട് മക്കളാണ് ഇവർക്കുള്ളത്.
