വെള്ളം നിറഞ്ഞ റോഡിലൂടെ ചെറു പുഞ്ചിരിയോടെ നടന്നു വരുന്ന ഒരു കുഞ്ഞ്. അവള്ക്ക് കരുതലായി പിറകെ വരുന്ന ഒരു ആന. സാമൂഹ്യ മാദ്ധ്യമങ്ങളില് വൈറലായി കൊണ്ടിരിക്കുന്ന വീഡിയോയിലെ ദൃശ്യങ്ങളാണിവ. ഇപ്പോള് മലയാളികളുടെ ഫേസ്ബുക്ക് പേജിലും വാട്ട്സ് ആപ്പ് സ്റ്റാറ്റസിലുമൊക്കെ നിറഞ്ഞു നില്ക്കുകയാണ് ഈ വീഡിയോ.
മനുഷ്യരും മൃഗങ്ങളും തമ്മിലുള്ള അടുപ്പമാണ് ഈ വീഡിയോ നമുക്ക് കാണിച്ചു തരുന്നത്. വീഡിയോ കാണുന്ന എല്ലാവരിലും ഏതാണ് ആ ആനയെന്ന് അറിയാന് ഒരു ആകാംക്ഷ ഉണ്ടാകും. ഉമാദേവി എന്നാണ് ഈ ആനയുടെ പേര്. തിരുവനന്തപുരം കൊഞ്ചിറവിളയിലുള്ള ഉമാ മഹേശ്വര മഠത്തിലെ തിരുമേനിയുടെ ആനയാണ് ഉമാദേവി. തിരുമേനിയുടെ മകളാണ് ഭാമ. ആനയും ഭാമയും തമ്മില് നല്ല അടുപ്പമാണ്.
സ്വന്തം കുഞ്ഞിനെ പോലെയാണ് ഭാമയെ ഉമ നോക്കുന്നത്. അമ്മയ്ക്ക് മകളോട് ഉള്ളതെന്ന് പോലെയുള്ള കരുതലും സ്നേഹവുമാണ് ഉമയ്ക്ക് ഭാമയോടുള്ളത്. ഉമയ്ക്ക് ഏറ്റവും അടുപ്പമുള്ളതും ഭാമയോട് തന്നെ. വീട്ടില് ഒരു അംഗത്തെ പോലെയാണ് ഉമാദേവിയെ കാണുന്നത്. വീഡിയോ വൈറലായതോടെ സാമൂഹ്യ മാദ്ധ്യമങ്ങളിലെ താരങ്ങളായി മാറിയിരിക്കുകയാണ് ഉമാദേവിയും ഭാമയും.
