ന്യൂഡല്ഹി: പശ്ചിമ ബംഗാളിലും ഒഡീഷയിലും വന് നാശം വിതച്ച ഉംപൂണ് ചുഴലിക്കാറ്റിന്റെ ആഘാതം വിലയിരുത്താന് കേന്ദ്ര സംഘം പശ്ചിമ ബംഗാളിലെത്തി. കേന്ദ്ര ആഭ്യന്തരവകുപ്പിന്റെ ഏഴംഗ സമിതിയാണ് പശ്ചിമബംഗാളിലേക്ക് എത്തുന്നത്. മെയ് 20നാണ് ബംഗാളിലെ സുന്ദര്ബന്സ് അടക്കമുള്ള മേഖലകളില് ഉംപൂണ് ആഞ്ഞടിച്ചത്.
ചുഴലിക്കാറ്റിന്റെ സമയത്ത് തന്നെ സംസ്ഥാനം സന്ദര്ശിച്ച പ്രധാന മന്ത്രി നരേന്ദ്രമോദി മുഖ്യമന്ത്രി മമതാ ബാനര്ജിയ്ക്ക് നല്കിയ ഉറപ്പിനെ തുടര്ന്നാണ് അടിയന്തിരമായി കേന്ദ്രസംഘം നാശനഷ്ടങ്ങളുടെ കണക്കുകളെടുക്കാന് എത്തിയത്.
കേന്ദ്ര ജോയിന്റ് സെക്രട്ടറി ചുമതല വഹിക്കുന്ന അനുജ് ശര്മ്മയുടെ നേതൃത്വത്തിലുള്ള സംഘം നാളെ പ്രശ്നബാധിത മേഖലകള് സന്ദര്ശിക്കും. ഒപ്പം സംസ്ഥാനത്തെ ഉദ്യോഗസ്ഥന്മാരുമായും കൂടിക്കാഴ്ച നടത്തും. കനത്ത നാശം ഉണ്ടായ കൊല്ക്കത്ത നഗരത്തിലും സന്ദര്ശനം നടത്തുമെന്നും സംഘം അറിയിച്ചു. തന്രെ സന്ദര്ശനവേളയില് അടിയന്തിരമായി 1000 കോടി രൂപയുടെ സഹായം പ്രധാനമന്ത്രി അനുവദിച്ചിരുന്നു.
