ലണ്ടന്‍: പാകിസ്താനില്‍ നിന്നും രക്ഷപെട്ട് കഴിയുന്ന അല്‍താഫ് ഹുസൈന്‍ ഇമ്രാന്‍ ഭരണകൂടത്തിനെതിരെ വീണ്ടും രംഗത്ത്. മൂത്താഹിദ ഖ്വാമി മൂവ്‌മെന്റ് നേതാവാണ് അല്‍താഫ് ഹുസൈന്‍. പാകിസ്താനിലെ മനുഷ്യാവകാശ ലംഘനത്തിനും ഭീകരത പ്രോത്സാഹിപ്പിക്കുന്നതും തടയിടാന്‍ അമേരിക്ക ശ്രമിക്കണമെന്നാണ് അല്‍താഫിന്റെ ശക്തമായ ആവശ്യം. നിലവില്‍ പാകിസ്താന് നല്‍കിക്കൊണ്ടിരിക്കുന്ന മുഴുവന്‍ സൈനിക സഹായങ്ങളും നിര്‍ത്താന്‍ തയ്യാറാകണമെന്നാണ് അല്‍താഫ് ആവശ്യപ്പെടുന്നത്. സിന്ധിലേയും പഞ്ചാബിലേയും മതന്യൂനപക്ഷ വിഭാഗങ്ങള്‍ക്ക് മേല്‍ പാകിസ്താനില്‍ നടക്കുന്ന അക്രമത്തില്‍ പ്രതിഷേധിക്കുകയായിരുന്നു അല്‍താഫ്.
‘ അമേരിക്കന്‍ ഭരണകൂടത്തിന് എഴുതിയ കത്തിലാണ് അല്‍താഫിന്റെ പാക് വിരുദ്ധ വികാരം പുറത്തുവന്നത്. പാകിസ്താന് സൈന്യം സിന്ധ്, ബലൂചിസ്താന്‍, പാക് അധിനിവേശ കശ്മീര്‍, ഗില്‍ഗിത് ബാല്‍ടിസ്താന്‍ എന്നിവടങ്ങളെ അടക്കി ഭരിക്കുകയാണ്. അതിക്രൂരമായ നടപടികളാണ് ജനങ്ങളോട് സൈന്യവും ഭീകരരും നടത്തുന്നത്. ഇതിന് പാക് ഭരണകൂടത്തിന്റെ പിന്തുണയുമുണ്ട്. ഇതിനെതിരെ അന്താരാഷ്‌ട്രസമൂഹം പാകിസ്താനില്‍ ശക്തമായി ഇടപെടണം. അമേരിക്ക എല്ലാത്തരം സഹായങ്ങളും നിര്‍ത്തലാക്കിയാല്‍ പാക് ഭരണകൂടം സമ്മര്‍ദ്ദത്തിലാകും.’ അല്‍താഫ് കത്തിലൂടെ വ്യക്തമാക്കി.
പാകിസ്താന് സ്വന്തം നാട്ടിലെ ജനങ്ങള്‍ക്ക് മാത്രമല്ല അഫ്ഗാനിസ്താനിലേയും ഇന്ത്യയിലേയും ജനങ്ങള്‍ക്ക് ഭീഷണിയാണെന്ന് അല്‍താഫ് പറഞ്ഞു. അഫ്ഗാന്‍ കേന്ദ്രീകരിച്ച് പ്രവര്‍ത്തിക്കുന്ന അല്‍ ഖ്വയ്ദ, താലിബാന്‍, ലഷ്‌ക്കര്‍, ജെയ്‌ഷെ മുഹമ്മദ് എന്നീ എല്ലാ ഭീകര സംഘടനയ്‌ക്കും പാകിസ്താന് സൈന്യമാണ് പരിശീലനമുള്‍പ്പടെ നല്‍കുന്നതെന്നും അല്‍താഫ് ചൂണ്ടിക്കാട്ടി.
