മുംബൈ : ലോകത്തെ തന്നെ ഏറ്റവും ജനപ്രിയമായ മിനി എസ്യുവി സുസുക്കി ജിമ്നിയുടെ മൂന്ന് ഡോർ വാഹനം ഇന്ത്യയിലേക്കില്ലെന്ന് ഉറപ്പിച്ച് മാരുതി സുസുക്കി. എന്നാൽ അഞ്ച് ഡോർ പതിപ്പിനെപറ്റിയുള്ള കൂടുതൽ വിവരങ്ങൾ കമ്പനി പുറത്തുവിട്ടിട്ടുമില്ല.
ആഭ്യന്തര വിപണിയിൽ കുഞ്ഞൻ ജിംനിയെ അവതരിപ്പിക്കുന്നതിന്റെ ഔചിത്യം കമ്പനിക്ക് ഇതുവരെ ബോധ്യപ്പെടാത്തതാണ് ഇതിനു കാരണം എന്ന് മാരുതിയെ ഉദ്ധരിച്ച് ദേശീയ മാധ്യമങ്ങൾ റിപ്പോർട്ട് ചെയ്യുന്നു. ഇന്ത്യയിൽ വാഹനത്തിന്റെ നിർമാണം നടക്കുന്നുണ്ടെങ്കിലും ഇവിടെ അവതരിപ്പിക്കാൻ ഒരു അഞ്ച് ഡോർ പതിപ്പ് തന്നെയാണ് അനുയോജ്യമെന്നാണ് കമ്പനിയുടെ വിലയിരുത്തൽ.
1970 ഏപ്രിലിലാണ് കുഞ്ഞൻ ഓഫ്റോഡർ എസ്യുവി അരങ്ങേറ്റം കുറിക്കുന്നത്. 50 വർഷം തികയുന്നതിന് ആഘോഷം അടുത്തിടെ മാരുതി നടത്തിയിരുന്നു. ഈ കാലയളവിനുള്ളിൽ 194 നഗരങ്ങളിലായി 2.85 ദശലക്ഷം യൂണിറ്റ് ജിമ്നിയാണ് കമ്പനി വിറ്റഴിച്ചത്.
ഇക്കഴിഞ്ഞ ഡൽഹി ഓട്ടോ എക്സ്പോയിലാണ് വാഹനത്തെ ഇന്ത്യയിൽ അവതരിപ്പിച്ചത്. മുൻപ് ജിമ്നിയെ പ്രാദേശിക വിപണിയിൽ അവതരിപ്പിക്കുന്നില്ല എന്ന് പറഞ്ഞ മാരുതി പിന്നീട് ഇന്ത്യൻ വിപണിയിലിറക്കാൻ തീരുമാനിക്കുകയായിരുന്നു. അടുത്ത വർഷത്തോടെ ജിമ്നി ഇന്ത്യൻ നിരത്തുകളിൽ എത്തുമെന്നായിരുന്നു റിപ്പോർട്ടുകൾ. എന്നാൽ ഇപ്പോൾ പുറത്ത് സൂചനകൾ പ്രകാരം ഇന്ത്യൻ വിപണിയിൽ 5 ഡോറുകളുള്ള പതിപ്പിനെയാകും മാരുതി അവതരിപ്പിക്കുക.
