മഹീന്ദ്രയുടെ ജനപ്രിയ മോഡലായ സ്കോർപിയോ പുതുതലമുറ എത്തുന്നു. ഒട്ടേറെ പുതുമകളോടെയാണ് സ്കോർപിയോയുടെ പുതുതലമുറ മോഡലിനെ മഹീന്ദ്ര അവതരിപ്പിക്കാനൊരുങ്ങുന്നത്. കഴിഞ്ഞ ദിവസം വാഹനത്തിന്റെ പരീക്ഷണ ഓട്ടത്തിന്റെ ചിത്രങ്ങൾ പുറത്ത് വന്നിരുന്നു. പുതിയ ലുക്കിനൊപ്പം പുത്തന് എന്ജിനിലുമായിരിക്കും പുതിയ സ്കോര്പിയോ നിരത്തിലെത്തുകയെന്നാണ് റിപ്പോര്ട്ടുകള്.
പുതിയ സ്കോര്പിയോയ്ക്ക് കരുത്ത് പകരുന്നതിനായി 2.0 ലിറ്റര് ടര്ബോ ഡീസല് എഞ്ചിനും വാഹനത്തില് ഇടംപിടിച്ചേക്കും. ആറ് സ്പീഡ് മാനുവല് ആയിരിക്കും ഗിയര്ബോക്സ്. കൂടാതെ ഉയര്ന്ന വകഭേദങ്ങളില് ഓപ്ഷനായി ഫോര് വീല് ഡ്രൈവും ലഭ്യമായേക്കും. ആറ് സ്പീഡ് ഓട്ടോമാറ്റിക് ഗിയര്ബോക്സും ഈ പതിപ്പില് ഉണ്ടാകുമെന്നാണ് റിപ്പോർട്ട്. നിലവില്, മഹീന്ദ്ര സ്കോര്പിയോ റിയര്-വീല് ഡ്രൈവ് ഓപ്ഷനില് മാത്രമേ ലഭ്യമാകൂ. നേരത്തെ ഫോര്-വീല് ഡ്രൈവ് ഓപ്ഷനുകള് ലഭ്യമായിരുന്നു. എന്നാൽ ബിഎസ് VI -ലേക്ക് നവീകരിച്ചതോടെ ഈ പതിപ്പ് കമ്പനി നിര്ത്തലാക്കി.
ആപ്പിള് കാര്പ്ലേ, ആന്ഡ്രോയിഡ് ഓട്ടോ സംവിധാനങ്ങളുള്ള ഇന്ഫോടെയ്ന്മെന്റ് സിസ്റ്റം, ഡ്യുവല് സോണ് എസി, മള്ട്ടി ഫങ്ഷന് സ്റ്റിയറിങ്ങ് വീല്, പുതുക്കിയ സെന്റര് കണ്സോള് എന്നിവ വാഹനത്തിന് ലഭിച്ചേക്കും. മറാസോയ്ക്ക് സമാനമായ ഉൾഭാഗമാകും പുതിയ സ്കോർപിയോയുടേതെന്നും സൂചനയുണ്ട്.
2.2 ലിറ്റര് എംഹോക്ക് ഡീസല് എന്ജിൻ കൂടാതെ 1.5 ലീറ്റര് എംസ്റ്റാലിയന് ടി-ജിഡിഐ പെട്രോള് എന്ജിനിലും സ്കോര്പിയോയുടെ പുതുതലമുറയെത്തിയേക്കും. 2021 ഏപ്രില്-ജൂണ് മാസത്തോടു കൂടി പുതുതലമുറ സ്കോര്പിയോ ഇന്ത്യന് വിപണിയില് ഇടംപിടിക്കും.
