ഗുവാഹട്ടി: അസമിലെ പ്രകൃതി വാതക കിണറിലുണ്ടായ പൊട്ടിത്തെറിയില് കാണാതായവരുടെ മൃതശരീരങ്ങള് കണ്ടെത്തി. രണ്ടു അഗ്നിശമന സേനാംഗങ്ങളാണ് കൊല്ലപ്പെട്ടത്. ദേശീയ ദുരന്തനിവാരണ സേനയാണ് മൃതദേഹം കണ്ടെത്തിയത്. കത്തിക്കൊണ്ടിരിക്കുന്ന കിണറിന് സമീപത്തുനിന്നാണ് മൃതദേഹം കിട്ടിയത്. ബാഗ്ഗഞ്ച് എന്ന സ്ഥലത്തുള്ള പ്രകൃതി വാതക കിണറ്റിലാണ് തീപിടുത്തമുണ്ടായത്. ദുറുലോവ് ഗൊഗോയ്(30), ബികേശ്വര് ഗോഹെയിന്(56) എന്നീ സേനാംഗങ്ങളാണ് തീയില്പ്പെട്ട് മരണമടഞ്ഞത്. കഴിഞ്ഞമാസം 27-ാം തീയതിയാണ് തീപിടുത്തം ഉണ്ടായത്. ശ്ക്തിയായി വാതകം പുറത്തേക്ക് വരുന്നതിനാല് തീ ഇതുവരെ നിയന്ത്രിക്കാനായിട്ടില്ല.
കിണറിലെ വാതകം പുറത്തേക്ക് എത്തിക്കാനുള്ള ഉപകരണങ്ങള് സ്ഥാപിക്കുന്ന വിദഗ്ധസംഘം സിംഗപ്പൂരില് നിന്നെത്തി പരിശോധനകള് നടന്നുവരുന്നതിനിടെയാണ് അപകടം സംഭവിച്ചിരിക്കുന്നത്. തീന്സുകിയ ജനവാസമേഖലയില് നിന്നും വെറും 9 കിലോമീറ്റര് മാത്രം ദൂരെയാണ് അഗ്നിബാധയുണ്ടായിരിക്കുന്നത്. അഗ്നിബാധ ഉണ്ടായ ഉടനെ പരിസരപ്രദേശത്തെ 2000 ജനങ്ങളെ നാലു ക്യാമ്പുകളിലേക്ക് മാറ്റിപാര്പ്പിച്ചതായി മുഖ്യമന്ത്രി സര്ബാനന്ദ് സോനോവാള് പറഞ്ഞു.
