ലണ്ടന്‍: ഐ.സി.സിയുടെ നിയമങ്ങള്‍ക്കനുസരിച്ച് കളം മാറ്റാന്‍ ക്രിക്കറ്റ് പന്തിന്റെ നിര്‍മ്മാതാക്കള്‍. കൊറോണ പ്രതിരോധത്തിന്റെ ഭാഗമായി പന്തില്‍ തുപ്പല്‍ പുരട്ടരുതെന്ന കര്‍ശനനിര്‍ദ്ദേശമാണ് മാറിച്ചിന്തിക്കാന്‍ നിര്‍മ്മാതാക്കളെ പ്രേരിപ്പിച്ചിരിക്കുന്നത്. രണ്ടു നിര്‍ദ്ദേശങ്ങളാണ് ഐ.സി.സി നല്‍കിയിരിക്കുന്നത്. കളിക്കിടയില്‍ പന്തില്‍ തുപ്പല്‍ തൂത്ത് മിനുസപ്പെടുത്താന്‍ പാടില്ല. തുപ്പലിലൂടെ അണുബാധയുണ്ടാകുമെന്ന മുന്നറിയിപ്പാണ് കാരണം. പകരമായി വിയര്‍പ്പ് പന്തില്‍ തുടയ്‌ക്കാം എന്ന നിര്‍ദ്ദേശമാണ് നല്‍കിയത്. എന്നാല്‍ തുടക്കത്തില്‍ മെഴുക് പന്തില്‍ പുരട്ടാനായി ഗ്രൗണ്ടില്‍ അമ്പയറുടെ കയ്യില്‍ കരുതാവുന്നതാണെന്ന നിര്‍ദ്ദേശവും പുറത്തുവന്നിരുന്നു.
പന്ത് നിര്‍മ്മാതാക്കള്‍ എന്നാല്‍ ഇവയൊന്നും പ്രശ്‌നമാക്കുന്നില്ല. ഈ പ്രത്യേക കാലഘട്ടത്തില്‍ കളിക്കാനായി നല്ല മിനുസമുള്ള പന്തുകള്‍ തന്നെ നിര്‍മ്മിക്കാനാണ് ഉദ്ദേശിക്കുന്നത്. ഡ്യൂക് ബാള്‍, എസ്ജി ബാള്‍ എന്നീ പ്രസിദ്ധമായ ബ്രാന്‍ഡുകളുടെ നിര്‍മ്മാതാക്കളായ ബ്രിട്ടീഷ് ക്രിക്കറ്റ് ബാള്‍സ് ലിമിറ്റഡാണ് പന്തുകള്‍ പ്രത്യേകമായി നിര്‍മ്മിക്കുന്നത്. ഇന്ത്യന്‍ വംശജനായ കമ്പനി ഉടമ ദിലീപ് ജജോഡിയയാണ് പുതിയ പന്തുകള്‍ നിര്‍മ്മിക്കുന്ന വിവരം അറിയിച്ചത്. അന്താരാഷ്‌ട്ര നിയമമനുസരിച്ച് പന്തില്‍ മറ്റ് രാസവസ്തുക്കളൊന്നും കളിക്കിടെ ഉപയോഗി ക്കരുതെന്ന നിയമം നിലനില്‍ക്കേ കളിക്കാര്‍ക്ക് എങ്ങനെ മെഴുക് ഉപയോഗിക്കാനാകും എന്നും ദിലീപ് ചോദിച്ചു.
