കാഠ്മണ്ഡു: ഇന്ത്യയുമായി അതിര്ത്തി വിഷയത്തില് ചര്ച്ചകള് അനിവാര്യമാണെന്ന് പ്രധാനമന്ത്രി കെ.പി.ശര്മ ഒലി. കാലാപാനി, ലിപൂലേക് ഉള്പ്പടെയുള്ള പ്രദേശങ്ങളെക്കുറിച്ചുള്ള ആശങ്ക പരിഹരിക്കാന് ചര്ച്ചകള് അനിവാര്യമാണെന്ന നിലപാടാണ് ഒലി എടുത്തിരിക്കുന്നത്. ഭൂപടത്തില് ഇന്ത്യയുടെ അതിര്ത്തി മേഖലകളെ ഉള്പ്പെടുത്തി നേപ്പാള് ഭൂപടം പുതുക്കിയിരുന്നു. എന്നാല് നേപ്പാള് പാര്ലമെന്റ് സമ്മേളനത്തില് വിഷയം ബോധ്യപ്പെടുത്താന് ഒലിക്കും ഭരണകക്ഷിയായ നേപ്പാള് കമ്യൂണിസ്റ്റ് പാര്ട്ടിക്കും ആയിട്ടില്ലെന്നാണ് അന്താരാഷ്ട്ര മാദ്ധ്യമങ്ങള് റിപ്പോര്ട്ട് ചെയ്യുന്നത്.
‘ അതിര്ത്തിയിലെ സ്ഥലം ഇന്ത്യ നേപ്പാളിനായി നല്കുമെന്നാണ് വിശ്വാസം.ചര്ച്ചകളിലൂടെ ആ വിഷയത്തില് തീരുമാനമുണ്ടാക്കും’ പാര്ലമെന്റിലെ ചോദ്യത്തിനുള്ള ഉത്തരമായി പ്രധാനമന്ത്രി ഒലി പറഞ്ഞു.
ഇന്ത്യ അതിര്ത്തിയില് കാളീ ക്ഷേത്രം പണിയുകയും മനുഷ്യനിര്മ്മിത നദി ഉണ്ടാക്കുകയും ചെയ്തു. ഒപ്പം വലിയ തോതിലുള്ള സൈനിക വിന്യാസമാണ് അതിര്ത്തിയില് നടത്തിയത്. കാലാപാനി ഭാഗത്താണ് ഇന്ത്യ സൈനിക നീക്കം നടത്തിയതെന്നും ഒലി പാര്ലമെന്റില് പറഞ്ഞു. ഇന്ത്യയുമായി അതിര്ത്തി വിഷയത്തില് കാണിച്ചിരിക്കുന്ന നടപടിക്കെതിരെ പ്രതിപക്ഷ കക്ഷികള് പ്രതിഷേധമുയര്ത്തി. ഒപ്പം ഇന്ത്യന് സൈനിക മേധാവി നല്കിയ മുന്നറിയിപ്പുകളും ചൈനയുടെ സഹായമുണ്ടെന്ന ഇന്ത്യന് മാദ്ധ്യമ റിപ്പോര്ട്ടുകളും സഭയില് പ്രതിപക്ഷാംഗങ്ങള് ഉന്നയിച്ചു.