ന്യൂഡല്ഹി: ഇന്ത്യ-ചൈന അതിര്ത്തി തര്ക്ക വിഷയത്തില് സേന കമാന്ഡര്മാര് നടത്തിയ ചര്ച്ച തീരുമാനമാകാതെ പിരിഞ്ഞതിന് പിന്നാലെ മേഖലയില് സുരക്ഷ വീണ്ടും ശക്തമാക്കി രാജ്യം. നേരത്തെ മുതല് തര്ക്കമുണ്ടായിരുന്ന പ്രദേശമാണെങ്കിലും ഗല്വാന് താഴ്വരയ്ക്ക് വേണ്ടി ചൈന ഇത്തരത്തില് അവകാശവാദമുന്നയിക്കുന്നത് ഇതാദ്യമായാണ്. അതിര്ത്തി സംഘര്ഷത്തിന്റെ പൂര്ണ്ണ ഉത്തരവാദിത്തം ചൈനയ്ക്കാണെന്ന നിലപാട് ചര്ച്ചയിലും ഇന്ത്യ ആവര്ത്തിച്ചു. പട്രോള് പോയിന്റ് 14ല് അനധികൃതമായി കടന്ന് കയറിയതിനെയും, പ്രദേശത്തിന് സമീപം നിരീക്ഷണ പോസ്റ്റ് നിര്മ്മിക്കാന് ചൈന നടത്തിയ ശ്രമങ്ങളെയും ഇന്ത്യ രൂക്ഷ ഭാഷയിലാണ് വിമര്ശിച്ചത്. ഇവിടെ നിന്ന് ചൈന പൂര്ണമായി പിന്മാറാതെ, ഇന്ത്യന് ഭാഗത്ത് നിന്നുള്ള സൈനികരെ പിന്വലിക്കില്ലെന്നും സേന തലവന്മാരുടെ ചര്ച്ചയില് ഇന്ത്യ വ്യക്തമാക്കിയിട്ടുണ്ട്.
ഗല്വാന് മേല് ചൈന ഉന്നയിച്ച അവകാശവാദത്തെയും ഇന്ത്യ തള്ളിക്കളഞ്ഞിട്ടുണ്ട്. ഈ പ്രദേശം ഇന്ത്യയുടേതാണെന്ന് സമ്മതിച്ചിരുന്ന ചൈന അടുത്തിടെയാണ് തങ്ങളുടെ നിലപാട് മാറ്റിയത്. ഗല്വാന് ചൈനയുടെ സ്ഥലമാണെന്നും, ചൈനയുടെ അതിര്ത്തിക്കുള്ളില് കടന്നു കയറി ഇന്ത്യന് സേന പ്രശ്നമുണ്ടാക്കുകയായിരുന്നുവെന്നുമുള്ള നിലപാടാണ് ചൈനീസ് വിദേശകാര്യ വക്താവ് ഷാവോ ലിജിയാന് വിഷയത്തില് നല്കിയത്. ഇന്ത്യന് സൈന്യത്തിന് മേല് പൂര്ണമായും പഴി ചാരിക്കൊണ്ടുള്ള പ്രകോപനമാണ് ചൈനീസ് സേന ഇപ്പോഴും നടത്തുന്നത്. ഈ അവസരത്തില് വിഷയം കൂടുതല് സംഘര്ഷാവസ്ഥയിലേക്ക് നീങ്ങാനുള്ള സാധ്യതയും സേന വൃത്തങ്ങള് ഇപ്പോള് തള്ളിക്കളയുന്നില്ല. അതുകൊണ്ടു തന്നെ ചൈനയുടെ ഭാഗത്ത് നിന്ന് ഏത് നിമിഷവും ഒരു ആക്രമണശ്രമം ഇന്ത്യ പ്രതീക്ഷിക്കുന്നുണ്ട്. അതീവ ജാഗ്രത പാലിക്കണമെന്ന മുന്നറിയിപ്പ് ഇന്ത്യന് സൈനികര്ക്ക് സേന മേധാവിമാര് നല്കിക്കഴിഞ്ഞു. അതിര്ത്തിയോട് ചേര്ന്നുള്ള സേനാതാവളങ്ങളിലേക്കുള്ള ആയുധനീക്കവും ഇന്ത്യ ഇപ്പോള് വേഗത്തിലാക്കിയിട്ടുണ്ട്.
ചൈനയുടെ നീക്കത്തിന് പിന്നില്
അക്സായ് ചിന്നിലേക്ക് ഇന്ത്യന് സൈന്യത്തിന് അതിവേഗം എത്താന് സാധിക്കുന്ന ഒരു മാര്ഗ്ഗമായിട്ടാണ് ഗല്വാന് താഴ്വരയെ ചൈന നിരീക്ഷിക്കുന്നത്. ചൈന പിടിച്ചുവച്ചിരിക്കുന്ന പ്രദേശമാണ് അക്സായ് ചിന്. ഇവിടേക്ക് ഇന്ത്യന് സേന കടന്ന് ചെന്ന് പ്രദേശം തിരികെ ഇന്ത്യയുടേതാക്കുമെന്നാണ് ചൈനയുടെ ഭയം. ഇതിന് ചുറ്റുമുള്ള മലകളും പ്രദേശങ്ങളും കൈക്കലാക്കിയാല് ഈ നീക്കത്തെ തടയാനാകുമെന്ന് ചൈന വിലയിരുത്തുന്നു. ഇവിടെ ഇന്ത്യ നടത്തിവന്നിരുന്ന ഓരോ വികസന പ്രവര്ത്തനങ്ങളും ഇതിന്റെ മുന്നൊരുക്കമായി ചൈന വിലയിരുത്തി. ദര്ബുക്-ഷയോക്-ദൗലത്ത് ബെഗ് ഓള്ഡീ (ഡിഎസ്ഡിബിഒ) റോഡിന്റെ നിര്മ്മാണം, മേഖലയിലെ നിരവധി പാലങ്ങളുടെ നിര്മ്മാണം എന്നിവയെല്ലാം ഇൗ നീക്കത്തിന്റെ ഭാഗമായാണ് അവര് കണ്ടത്. ഗല്വാനില് തങ്ങളുടെ മേധാവിത്വം സ്ഥാപിച്ചാല് ഡിഎസ്ഡിബിഒ റോഡുള്പ്പെടെയുള്ളവയുടെ നിയന്ത്രണവും ഇന്ത്യയുടെ നീക്കങ്ങളേയും ചെറുക്കാമെന്നും ചൈന കണക്കുകൂട്ടി.
