കൊച്ചി: ഭർത്താവ് ഓടിച്ച സ്കൂട്ടർ അപകടത്തിൽപ്പെട്ട് ഗുരുതരമായി പരിക്കേറ്റ ഭാര്യ, അശ്രദ്ധമായി വാഹനം ഓടിച്ചെന്നാരോപിച്ച് ഭർത്താവിനെതിരെ കോടതിയെ സമീപിച്ചതിനെ തുടർന്ന് പോലീസ് കേസെടുത്തു.
വെങ്ങോല അറയ്ക്കപ്പടി പുതുക്കുടി വീട്ടിൽ സൈനബ (47) നൽകിയ പരാതിയിലാണ് ഭർത്താവ് യൂസഫിനെതിരെ കുന്നത്തുനാട് പോലീസ് കേസ് രജിസ്റ്റർ ചെയ്തത്. കോലഞ്ചേരി ജുഡീഷ്യൽ ഒന്നാം ക്ലാസ് മജിസ്ട്രേറ്റ് കോടതി സ്വകാര്യ പരാതി സ്വീകരിച്ച് അന്വേഷണത്തിനായി പോലീസിന് കൈമാറുകയായിരുന്നു.
ഏപ്രിൽ 16-ന് രാത്രി 9.30-ഓടെ ചീനിക്കുഴി റബർ പാർക്ക് റോഡിലൂടെ സഞ്ചരിക്കുമ്പോഴാണ് അപകടം നടന്നത്. യൂസഫ് ഓടിച്ച സ്കൂട്ടറിന്റെ പിന്നിലിരുന്ന സൈനബ, റോഡിലെ ഹമ്പിൽ വാഹനം നിയന്ത്രണം വിട്ട് മറിഞ്ഞതോടെ റോഡിലേക്ക് തെറിച്ചുവീഴുകയായിരുന്നു.
അമിതവേഗത്തിലും അശ്രദ്ധയോടെയും വാഹനം ഓടിച്ചതാണ് അപകടത്തിന് കാരണമായതെന്നാണ് പരാതിയിൽ പറയുന്നത്. അപകടത്തിൽ സൈനബയുടെ മുഖത്തിനും പുരികത്തിനും ഗുരുതര പരിക്കേറ്റതായും പരാതിയിൽ വ്യക്തമാക്കുന്നു.
കോടതിയുടെ നിർദേശത്തെ തുടർന്ന് കുന്നത്തുനാട് പോലീസ് കേസെടുത്ത് സംഭവത്തിൽ അന്വേഷണം ആരംഭിച്ചിട്ടുണ്ട്.
