വാഷിംഗ്ടൺ : അതിർത്തിയിലുണ്ടായ സംഘർഷത്തിൽ ഇന്ത്യൻ സൈനികർ വീരമൃത്യു വരിച്ചതിൽ അഗാധമായ ദുഖം രേഖപ്പെടുത്തി അമേരിക്ക. അമേരിക്കൻ സ്റ്റേറ്റ് സെക്രട്ടറി മൈക്ക് പോമ്പിയോ ആണ് അനുശോചനം അറിയിച്ചത്. ഇന്ത്യൻ സൈനികരുടെ കുടുംബങ്ങളേയും പ്രിയപ്പെട്ടവരേയും അമേരിക്ക എന്നും ഓമ്മിക്കുമെന്നും മൈക്ക് പോമ്പിയോ വ്യക്തമാക്കി. ട്വിറ്ററിലൂടെയായിരുന്നു പ്രസ്താവന.
അടുത്തിടെ ചൈനയുമായുള്ള ഏറ്റുമുട്ടലിന്റെ ഫലമായി ഇന്ത്യൻ സൈനികരുടെ ജീവത്യാഗം സംഭവിച്ചതിൽ അഗാധമായ ദു:ഖം രേഖപ്പെടുത്തുന്നു. ഇന്ത്യയിലെ ജനങ്ങൾക്ക് ഞങ്ങളുടെ അഗാധമായ അനുശോചനം അറിയിക്കുന്നു. സൈനികരുടെ ദുഖാർത്തരായ കുടുംബങ്ങളെയും പ്രിയപ്പെട്ടവരെയും ഞങ്ങൾ ഓർമ്മിക്കും. മൈക്ക് പോമ്പിയോ വ്യക്തമാക്കി.
ചൈനക്കെതിരെ ശക്തമായ നിലപാടുമായി നേരത്തെ തന്നെ അമേരിക്ക രംഗത്തെത്തിയിരുന്നു. കൊറോണ വ്യാപനത്തെ തുടർന്ന് ഇരു രാജ്യങ്ങളും തമ്മിലുള്ള ബന്ധം കൂടുതൽ വഷളായിരുന്നു. സമുദ്രമേഖലയിലുള്ള ചൈനയുടെ അനാവശ്യ ഇടപെടലിനെതിരെ മൂന്ന് വിമാനവാഹിനി പടക്കപ്പലുകളെ അമേരിക്ക പസഫിക് മേഖലയിലേക്ക് അയക്കുകയും ചെയ്തിട്ടുണ്ട്.
