ന്യൂഡല്ഹി: അന്താരാഷ്ട്ര യോഗാ ദിനത്തിനായി ലോകം ഒരുങ്ങി. കൊറോണ മഹാമാരിയെ പ്രതിരോധിക്കാന് സ്വയം ശക്തിപ്പെടുക എന്ന സന്ദേശമാണ് ഇത്തവണ യോഗദിനത്തിന്റേത്. പ്രധാനമന്ത്രി നരേന്ദ്ര മോദി മുന്നോട്ട് വച്ച ‘ എന്റെ ജീവിതം എന്റെ യോഗ ‘ എന്ന സന്ദേശം ഇത്തവണ ആഗോളതലത്തില് ഏറ്റെടുത്തിരിക്കുകയാണ്.
എല്ലാവര്ഷവും ലോകത്തിലെ എല്ലാ നഗരങ്ങളിലും വിപുലമായ രീതിയിലാണ് യോഗാ ദിനം നടക്കാറ്. ഇത്തവണത്തെ യോഗാദിന ഒത്തുകൂടല് നാളെ കൊറോണ പ്രതിരോധ നിര്ദ്ദേശമനുസരിച്ചാണ് ലോകരാഷ്ട്രങ്ങള് നടത്തുന്നത്. നാളെ രാവിലെ 7 മണിക്കാണ് ഇന്ത്യയില് എല്ലായിടത്തും പരിശീലനം നടത്താന് ആയുഷ് മന്ത്രാലയം നിര്ദ്ദേശിച്ചി രിക്കുന്നതെന്ന്് ആയുഷ് വിഭാഗം കേന്ദ്രമന്ത്രി ശ്രീപദ് യശോനായിക് പറഞ്ഞു.
വീടുകളിലും തൊഴിലിടങ്ങളിലും സാമൂഹിക അകലം പാലിച്ചുള്ള ഇത്തവണത്തെ യോഗ അഭ്യാസം ലോകത്തിന് വലിയൊരു ആരോഗ്യ സന്ദേശം നല്കുമെന്നും നരേന്ദ്രമോദി പറഞ്ഞു. 6-ാം മത് അന്താരാഷ്ട്രയോഗാ ദിനമാണ് നാളെ ആചരിക്കുന്നത്. വീട്ടിനുള്ളില് മുഴുവന് കുടുംബാംഗങ്ങളും ഒത്തുചേര്ന്നുള്ള യോഗാദിനമായി ആചരിക്കണമെന്ന് നരേന്ദ്രമോദി പറഞ്ഞു. മന് കീ ബാത്തില് നരേന്ദ്രമോദി യോഗാ ദിനം വ്യാപകമായി നടത്തേണ്ടതിന്റെ പ്രാധാന്യം ഊന്നിപ്പറഞ്ഞിരുന്നു.
പൊതു സ്ഥലങ്ങളിലെ യോഗാഭ്യാസം ഇത്തവണ നടത്താന് അനുവാദമില്ല. ഓണ്ലൈന് പരിശീലനങ്ങള് വ്യാപകമാക്കാന് കിട്ടിയ അവസരം എല്ലാവരും പ്രയോജനപ്പെ ടുത്തണമെന്നും നരേന്ദ്രമോദി തന്റെ സന്ദേശത്തില് പറഞ്ഞിരുന്നു. ആയുഷ് മന്ത്രാലയത്തിന്റെ ആഭിമുഖ്യത്തില് ഓണ്ലൈന് യോഗാ മത്സരങ്ങളും ഇത്തവണത്തെ പ്രത്യേകതയാണ്. പൊതുജനത്തിന് സാമൂഹികമാദ്ധ്യമങ്ങളിലൂടെ ആയുഷ് മന്ത്രാലയത്തിന്റെ യോഗാ ക്ലാസ്സുകള് നാളെ ലഭ്യമായിരിക്കുമെന്നും ആയുഷ് മന്ത്രാലയം അറിയിച്ചു.
