ന്യൂഡല്സി: ചൈനീസ് അതിര്ത്തിക്ക് സമീപം ആക്രമണപ്പറക്കല് നടത്തി ഇന്ത്യന് യുദ്ധവിമാനങ്ങള്. യഥാര്ത്ഥ നിയന്ത്രണ രേഖക്ക് സമീപമാണ് ഇന്ത്യന് പോര്വിമാനങ്ങള് ആക്രമണപ്പറക്കല് നടത്തിയത്. അതിര്ത്തിയില് ചൈന പ്രകോപനം സൃഷ്ടിക്കുന്ന സാഹചര്യത്തിലാണ് ശക്തമായ മുന്നറിയിപ്പുമായി വ്യോമസേന രംഗത്തെത്തിയിരിക്കുന്നത്.
അതേസമയം, ഇരു രാജ്യങ്ങളും തമ്മില് കമാന്ഡര് തലത്തിലുള്ള ചര്ച്ചകള് പുരോഗമിക്കുകയാണ്. കഴിഞ്ഞ ദിവസം രാവിലെ 11.30ഓടെ ആരംഭിച്ച ചര്ച്ചകള് 11 മണിക്കൂറോളം നീണ്ടുനിന്നു. ലഫ്. ജനറല് ഹരീന്ദര് സിംഗിന്റെ നേതൃത്വത്തിലാണ് ചര്ച്ച നടന്നത്. ഇത് രണ്ടാം തവണയാണ് ഇരുവിഭാഗവും ചര്ച്ചകള് നടത്തുന്നത്. നേരത്തെ, ജൂണ് 6നും സമാനമായ രീതിയില് ചര്ച്ചകള് നടന്നിരുന്നു. എന്നാല്, ചര്ച്ചകള് നടന്നതിനു ശേഷവും ചൈന പ്രകോപനം തുടരുകയാണുണ്ടായത്.
അതിര്ത്തി പ്രദേശങ്ങളിലെ സ്ഥിതിഗതികള് വിലയിരുത്താന് കരസേന മേധാവി ജനറല് മനോജ് മുകുന്ദ് നരവാനെ ഇന്ന് ലേയിലെത്തും. ഇന്ത്യാ- ചൈന അതിര്ത്തിയായ യഥാര്ത്ഥ നിയന്ത്രണ രേഖയിലും പാകിസ്താന് അതിര്ത്തിയിലുമുള്ള സൈനിക വിന്യാസവും സ്ഥിതിഗതികളും അദ്ദേഹം വിലയിരുത്തുമെന്നാണ് റിപ്പോര്ട്ട്. നേരത്തെ, അതിര്ത്തിയിലെ ചൈനീസ് പ്രകോപനത്തിന്റെ പശ്ചാത്തലത്തില് ജൂണ് 19ന് വ്യോമസേന മേധാവി ആര്.കെ.എസ് ബദൗരിയ നേരിട്ട് ലഡാക്കിലെത്തി സ്ഥിതിഗതികള് വിലയിരുത്തിയിരുന്നു.
