ജൊഹന്നാസ്ബര്ഗ്: ദക്ഷിണാഫ്രിക്കന് ക്രിക്കറ്റ് ബോര്ഡ് നടത്തിയ പരിശോധനയില് 7 പേര്ക്ക് കൊറോണ സ്ഥിരീകരിച്ചതായി റിപ്പോര്ട്ട്. കളിക്കാര്ക്കും ജീവനക്കാര്ക്കും ഒരുമിച്ച് നടത്തിയ പരിശോധനയിലാണ് ഏഴു ഫലങ്ങള് പോസിറ്റീവായത്. എന്നാല് ഇവരില് ക്രിക്കറ്റ് താരങ്ങളുണ്ടോ എന്ന വിവരം ഇതുവരെ പുറത്തുവിട്ടിട്ടില്ല. ആകെ 100 പേരെയാണ് പരിശോധനയ്ക്ക് വിധേയരാക്കിയത്. സി.ഇ.ഒ ജാക്വസ് ഫോളാണ് പരിശോധനാ വിവരം പുറത്തുവിട്ടത്.
ദക്ഷിണാഫ്രിക്കന് ആഭ്യന്തര ലീഗ് മത്സരങ്ങള് ഈ മാസം തുടങ്ങാന് നിശ്ചയിച്ചിരുന്നെങ്കിലും പിന്നീട് അത് മാറ്റിവയ്ക്കുകയായിരുന്നു. 27നാണ് മത്സരങ്ങള് തുടങ്ങാനിരുന്നത്. ഇതു കൂടാതെ മൂന്ന് ടീമുകള് പങ്കെടുക്കുന്ന സോളിഡാരിറ്റി കപ്പ് ടൂര്ണ്ണമെന്റും ദക്ഷിണാഫ്രിക്ക തല്ക്കാലം മാറ്റിയിരിക്കുകയാണ്.
ഇന്ത്യയില് ദക്ഷിണാഫ്രിക്കന് ടീം പരമ്പരക്കായി കഴിഞ്ഞ ഏപ്രിലിലാണ് എത്തിയത്. അന്ന് ധര്മ്മശാലയില് നടക്കേണ്ടിയിരുന്ന മത്സരം മഴമൂലം മുടങ്ങിനില്ക്കേയാണ് ലോകവ്യാപ കമായി കൊറോണ വ്യാപനവും ലോക്ഡൗണും പ്രഖ്യാപിച്ചത്. നാട്ടിലേക്ക് തിരികെ പോയ മുഴുവന് താരങ്ങളും ക്രിക്കറ്റ് ബോര്ഡിന്റെ നിര്ദ്ദേശ പ്രകാരം വീടുകളില് ക്വാറന്റൈനില് പ്രവേശിച്ചിരുന്നു.