മുംബൈ: ഇന്ത്യയില്‍ നടക്കാനിരിക്കുന്ന ലോകകപ്പിന് സുരക്ഷയൊരുക്കണമെന്ന പാക് വാദത്തിന്റെ മുനയൊടിച്ച് ഇന്ത്യന്‍ ക്രിക്കറ്റ്‌ബോര്‍ഡ്. ഭീകരാക്രമണം ഇനി ഉണ്ടാവില്ലെന്ന് പി.സി.ബി ഉറപ്പുനല്‍കിയാല്‍ തിരിച്ചും ഉറപ്പുനല്‍കാമെന്ന ചുട്ടമറുപടിയാണ് ബി.സി.സി.ഐ നല്‍കിയത്. ഇന്ത്യയില്‍ ലോകകപ്പ് ക്രിക്കറ്റ് കളിക്കാന്‍ വരണമെങ്കില്‍ പാകിസ്താന് താരങ്ങളുടെ സുരക്ഷയും വിസയും ഇന്ത്യ ഉറപ്പാക്കണമെന്ന് പാകിസ്താന് ക്രിക്കറ്റ് ബോര്‍ഡ് ആവശ്യപ്പെട്ടിരുന്നു. പി.സി.ബിയുടെ പുതിയ മേധാവി വാസിം ഖാനാണ് ആവശ്യങ്ങള്‍ ഉന്നയി ച്ചത്.
‘ പി.സി.ബി ആദ്യം ചില കാര്യങ്ങള്‍ എഴുതി ഇന്ത്യക്ക് ഉറപ്പുതരണം. പുല്‍വാമയുടേത് പോലുള്ള ഭീകരാക്രമണം ഉണ്ടാവില്ല എന്നതാണ് ആദ്യത്തേത്. നുഴഞ്ഞുകയറ്റം ഇനി ഉണ്ടാവില്ല എത് രണ്ടാമത്തെത്. ഇതിന്റെ ഉറപ്പ് നല്‍കേണ്ടത് പാകിസ്താന് സര്‍ക്കാരാണ്. ഇന്ത്യയുടെ താല്‍പ്പര്യങ്ങള്‍ക്കെതിരെ പ്രവര്‍ത്തിക്കുന്ന ഒരു ഏജന്റിനെപ്പോലെ പി.സി.ബി പെരുമാറുന്നത് ശരിയല്ല’ ബി.സി.സി.ഐ മറുപടി നല്‍കി.
വരാനിരിക്കുന്ന അടുത്ത വര്‍ഷത്തെ ടി20 ലോകകപ്പും 2023ലെ ഏകദിന ലോകകപ്പും ഇന്ത്യയിലാണ് നടക്കുന്നത്. കൊറോണ കാരണം ഇന്ത്യയിലെ ഒരു മേഖലയിലെ ക്രിക്കറ്റ് മത്സരങ്ങളും ഇനിയും പുനരാരംഭിച്ചിട്ടില്ല. പരിശീലനങ്ങള്‍ വ്യക്തിഗതമായി മാത്രമാണ് നടക്കുന്നത്. ടി20 എന്നു നടക്കണം എന്നതിനെപ്പറ്റി ഐ.സി.സി തീരുമാനം അറിയിക്കാത്തതിനാല്‍ ഐ.പി.എല്‍ മത്സരങ്ങളുടെ കാര്യവും അനിശ്ചിതത്വത്തിലാണ്.
