മുംബൈ : രാജ്യത്തെ ആദ്യ അലക്സാ റിമോട്ട് കണക്ടഡ് കാർ പുറത്തിറക്കാനൊരുങ്ങി ഹോണ്ട. ഹോണ്ടയുടെ ജനപ്രിയ മോഡലായ സിറ്റിയുടെ ഏറ്റവും പുതിയ പതിപ്പിലാണ് പുതിയ ഫീച്ചർ ഇടം പിടിക്കുന്നത്. ഇതിന്റെ ടീസറും കമ്പനി പുറത്തിറക്കിയിട്ടുണ്ട്. വാഹനം ജൂലൈ മാസത്തോടെ വിപണിയിലെത്തിക്കാനാണ് ഹോണ്ട ലക്ഷ്യമിടുന്നത്.
നാല് എയര്ബാഗുകള്, ക്രൂയിസ് കണ്ട്രോള്, ടയര് പ്രഷര് മോണിറ്ററിംഗ് സിസ്റ്റം, ട്രാക്ഷന് കണ്ട്രോള്, അലക്സയെ പിന്തുണയ്ക്കുന്ന 8.0 ഇഞ്ച് ടച്ച്സ്ക്രീന് ഇന്ഫോടെയ്ന്മെന്റ് സിസ്റ്റം എന്നിവയാകും അഞ്ചാം തലമുറ സിറ്റിയുടെ പ്രധാന സവിശേഷതകളെന്നാണ് പുറത്തുവരുന്ന റിപ്പോർട്ടുകൾ. ഹോണ്ട പുതുതായി വികസിപ്പിച്ച പ്ലാറ്റ്ഫോമിനെ അടിസ്ഥാനമാക്കിയുള്ളതാണ് സിറ്റി. ഈ പ്ലാറ്റ്ഫോം ഭാരം കുറഞ്ഞതും സുരക്ഷിതവുമാണെന്നാണ് കമ്പനി അവകാശപ്പെടുന്നത്.
4,549 mm നീളവും 1,748 mm വീതിയും 1,489 mm ഉയരവും 2,600 mm വീല്ബേസുമുണ്ട് വാഹനത്തിന്. 1.5 ലിറ്റര് പെട്രോള്, 1.5 ലിറ്റര് ഡീസല് എഞ്ചിനിലാകും പുതിയ സിറ്റി എത്തുന്നത്. മാർച്ച് മാസത്തോടെ വാഹനം വിപണിയിലെത്തിക്കാനായിരുന്നു കമ്പനിയുടെ പദ്ധതി. എന്നാൽ കൊറോണയും ലോക്ക് ഡൗണും മൂലം ഇത് മാറ്റിവെക്കുകയായിരുന്നു. വാഹനത്തിന്റെ വില അടക്കമുള്ള വിവരങ്ങൾ പുറത്തുവിട്ടിട്ടില്ല.