ഏതോ ഹോളിവുഡ് സിനിമയില് എന്ന പോലെ, സാധാരണക്കാരന്റെ ഭാവനയുടെ അറ്റത്ത് പോലും എത്താത്ത ഒരു അവസ്ഥയിലൂടെ കടന്നുപോകുകയാണ് നാം ഇപ്പോള്. ഏതോ വിദേശ ഭക്ഷ്യവിഭവത്തെ ഓര്മിപ്പിക്കുന്ന പേരോടുകൂടിയ ഒരു പുത്തന് അസുഖം ചൈനയില് പൊട്ടിപ്പുറപ്പെട്ടെന്ന് കേട്ടപ്പോള് നമ്മള് നമ്മുടെ വീടുകളിലും കളിസ്ഥലങ്ങളിലും ജോലിസ്ഥലങ്ങളിലും ഇരുന്നു സഹതപിച്ചു. പക്ഷേ കടലുകള് താണ്ടി മൈലുകള് കടന്നു അതിങ്ങു ഭാരതത്തില് എത്തിയപ്പോള് നമ്മുടെ ആഘോഷ ശീലങ്ങളെ വഴിയിലുപേക്ഷിച്ച് വീടിന്റെ മിതത്വത്തിലേക്ക് നമ്മുക്ക് മടങ്ങേണ്ടി വന്നു.
മലയാളിയുടെ ആഘോഷശീലങ്ങളെ മാറ്റിമറിച്ചു കൊറോണ. നെഞ്ചിടിപ്പില്ലാതെ ശാന്തമായി കുറച്ചു അച്ഛന്മാരെങ്കിലും അവരുടെ പെണ്മക്കളുടെ വിവാഹം നടത്തിയിരിക്കും ഈ കൊറോണ കാലത്ത്. കാട്ടികൂട്ടലുകളും ആഡംബരങ്ങളും ഇല്ലാതെ വീട്ടുമുറ്റങ്ങള് കല്യാണപ്പന്തലുകള്ക്ക് സ്ഥലമേകി. ആര്പ്പുവിളികളും ആരവങ്ങളും ഗാനമേളയും മിമിക്രിയും ഇല്ലാതെ ആരാധനാലയങ്ങള് ഉല്സവങ്ങളും പെരുന്നാളുകളും നടത്തി.
വിദേശ സംസ്കാരത്തിന്റെ കടന്നുകയറ്റത്തോടെ നമ്മള് വിസ്മൃതിയില് എറിഞ്ഞ ചില ഭാരതീയ സംസ്കാരങ്ങള് പൊടിതട്ടിയെടുക്കേണ്ടി വന്നു നമ്മള്ക്ക്. ഹസ്തദാനം ചെയ്യാന് മുന്നിട്ടിറങ്ങിയ വലത്തെ കരത്തെ പറഞ്ഞു മനസിലാക്കി നമ്മള് ഇടം കയ്യോടു ചേര്ത്തുവെച്ചു നമസ്കാരം പറഞ്ഞു. കയ്യും കാലും മുഖവും ഇടയ്കിടയ്ക്ക് കഴുകേണ്ടി വന്നപ്പോഴാണ് പണ്ട് കാരണവന്മാര് കിണ്ടി പണിഞ്ഞത് ഉരച്ചു തേച്ചു മിനുക്കി കണ്ണാടികൂട്ടില് വെയ്ക്കാനല്ല എന്നു മനസിലായത്. മഞ്ഞളും ഇഞ്ചിയും പ്രതിരോധശേഷി വര്ദ്ധിപ്പിക്കും എന്നു വാട്സാപ്പ് അറിയിച്ചപ്പോഴാണ് പറമ്പിലെ ഏതോ മൂലയില് മണ്ണിനടിയില് വര്ഷങ്ങളായി ഉറക്കമായിരുന്ന ഇഞ്ചിയേയും മഞ്ഞളിനെയും തേടി നമ്മള് ഇറങ്ങിയത്.
എല്ലാ തൊഴിലിനും അതിന്റേതായ മാന്യതയുണ്ടെന്നും നമ്മള് മേന്മയായി കണ്ടിരുന്ന പല ജോലികളും ശാശ്വതമല്ലെന്നും കൊറോണ നമ്മോടു പറഞ്ഞു. വന്കിട തൊഴിലിടങ്ങള് കയ്യൊഴിഞ്ഞപ്പോള് മീന് വില്പ്പനയ്കിറങ്ങിയ യുവാക്കള് താരങ്ങളായി. വീടുകളില് ഇരുന്നു നെയ്യപ്പം മുതല് വൈറ്റ് ഫോറെസ്റ്റ് കേക്ക് വരെ നമ്മള് ഉണ്ടാക്കി. ചിലര് യൂട്യൂബുകള് പോലെയുള്ള ഇടങ്ങളില് പുത്തന് വരുമാനമാര്ഗം തേടി. ഒരുപാടുനാളുകള്ക്ക് ശേഷം കുടുംബങ്ങള് തീന്മേശയ്ക്ക് ചുറ്റും കൂടിയിരുന്നു വിശേഷങ്ങള് പറഞ്ഞു. എല്ലാ വീടുകളിലും പുതിയ ഒരു അംഗം കൂടിയെത്തി. പല നിറങ്ങളിലും വലിപ്പത്തിലും ഉള്ള മുഖാവരണങ്ങള്.
കരുതലോടെ,ജാഗ്രതയോടെ നമ്മള് ഈ കാലവും തരണം ചെയ്യുമെന്ന് പ്രതീക്ഷിക്കാം .പക്ഷേ,കൊറോണ നമ്മെ പഠിപ്പിച്ച ചിലതുണ്ട്. ജീവിച്ചിരിക്കുക എന്നതിലും വലിയ നേട്ടമൊന്നും ഈ ഒരു മനുഷ്യജീവിതത്തില് ഉണ്ടാവാനിടയില്ല എന്നതാണു അതില് ഏറ്റവും മുഖ്യം. ഓട്ടത്തിനിടയില് അല്പ്പം വിശ്രമിച്ച് അവനവനിലേക്ക് തന്നെ നോക്കാനും കഴിഞ്ഞു നമ്മുക്ക് ഈ കൊറോണ കാലത്ത്. കൊറോണ ഒരു വലിയ മികച്ച പാഠപുസ്തകമാണ്. ഇടയ്ക്കിടയ്ക്ക് ഒന്നു മറിച്ചു നോക്കേണ്ട ഒന്ന്. പഠിച്ച പാഠങ്ങള് നാം മറക്കാതിരിക്കട്ടെ.