ബ്രസീല്: ലോകം മുഴുവന് ഒരു കുഞ്ഞുബാലന്റെ കരച്ചിലിനും ചിരിക്കുമായി കാതോര്ക്കുകയാണ്. സിംബ്രാകൈഡാക്ടിലി എന്ന അപൂര്വ്വ അവസ്ഥയുമായി ജനിച്ച ഹോസെ എന്ന കുരുന്നിന്റെയും, അവന്റെ കുഞ്ഞുവിരലുകള്ക്ക് കരുത്തുപകരുന്ന ഒരച്ഛന്റെയും കഥ സോഷ്യല് മീഡിയയുടെ ഹൃദയം കവരുകയാണ്. ശാരീരിക പരിമിതികളുള്ള കുഞ്ഞുങ്ങളെ സഹതാപത്തോടെ നോക്കുന്നവര്ക്ക് മുന്നില്, അവരെ സ്വയംപര്യാപ്തരാക്കാന് പോരാടുന്ന ഈ മാതാപിതാക്കള് ഒരു വലിയ പാഠപുസ്തകമാവുന്നു.
നീളം കുറഞ്ഞ കൈകളും ഓരോ കൈയിലും രണ്ടു വീതം വിരലുകളുമായാണ് ഹോസെ ജനിച്ചത്. മറ്റുള്ള കുട്ടികളെപ്പോലെ ഓടിക്കളിക്കാനോ ഭക്ഷണം കഴിക്കാനോ തനിക്ക് കഴിയില്ലെന്ന് ആ പിഞ്ചുമനസ്സ് തിരിച്ചറിഞ്ഞ നിമിഷങ്ങള് വേദനാജനകമായിരുന്നു. അച്ഛന് സ്പൂണ് കയ്യില് വെച്ചു കൊടുക്കുമ്പോള്, വിരലുകള്ക്കിടയില് അത് നില്ക്കാതെ വരുമ്പോള് ഹോസെ വാവിട്ടു കരയുന്ന ദൃശ്യങ്ങള് ആരുടെയും കണ്ണ് നിറയ്ക്കും.
‘എനിക്ക് സ്പൂണ് പിടിക്കാനാവുന്നില്ല അച്ഛാ…’ എന്ന് പറഞ്ഞ് കരയുന്ന മകനെ ചേര്ത്തുപിടിക്കുകയല്ല ആ അച്ഛന് ചെയ്തത്. പകരം, ആ കുഞ്ഞുവിരലുകള്ക്കിടയിലേക്ക് വീണ്ടും സ്പൂണ് വെച്ചു കൊടുത്തു. ഓരോ പരാജയത്തിന് ശേഷവും മകനെക്കൊണ്ട് തന്നെ അത് ചെയ്യിപ്പിച്ചു. ഒടുവില്, കരച്ചിലിനിടയിലും ആ സ്പൂണ് ഉപയോഗിച്ച് ഹോസെ സ്വയം ഭക്ഷണം കഴിക്കാന് പഠിച്ചു. മകന്റെ വിജയത്തില് സന്തോഷിച്ച അച്ഛന് ഹോസെ തന്നെ തന്റെ കുഞ്ഞു കൈകള് കൊണ്ട് ഭക്ഷണം വാരിക്കൊടുക്കുന്ന കാഴ്ച സ്നേഹത്തിന്റെ ഉത്തമ ഉദാഹരണമായി മാറി.
മറ്റൊരു വീഡിയോയില് ഒരു പേപ്പര് തറയില് നിന്ന് എടുക്കാന് ഹോസെ പാടുപെടുന്നത് കാണാം. വിരലുകള്ക്ക് വഴങ്ങാത്ത പേപ്പറിന് മുന്നില് തോറ്റുപോയ ഹോസെ കരയുമ്പോഴും, അവനെ സഹായിക്കാന് ഓടിയെത്താതെ ദൂരേക്ക് മാറിനിന്ന് അവനെ പ്രോത്സാഹിപ്പിക്കുകയായിരുന്നു ആ പിതാവ്. ആവര്ത്തിച്ചുള്ള ശ്രമങ്ങള്ക്കൊടുവില് ആ പേപ്പര് ഹോസെയുടെ വിരലുകള്ക്കിടയില് ഭദ്രമായി.
പരിമിതികളുള്ള കുഞ്ഞുങ്ങളെ ലോകത്തിന് മുന്നില് നിന്ന് ഒളിപ്പിച്ചു വെക്കുന്നവര്ക്കും, അവരെ ഉപേക്ഷിക്കുന്നവര്ക്കും ഹോസെയുടെ മാതാപിതാക്കള് നല്കുന്ന സന്ദേശം വ്യക്തമാണ്: ‘അവര്ക്ക് വേണ്ടത് സഹതാപമല്ല, മറിച്ച് ലോകത്തെ നേരിടാനുള്ള കരുത്താണ്.’
View this post on Instagram
ബ്രസീലിലെ ഈ സംരംഭക ദമ്പതികള് ഇന്ന് സോഷ്യല് മീഡിയയിലെ താരങ്ങളാണ്. ലക്ഷക്കണക്കിന് ആളുകളാണ് ഈ വീഡിയോകള് കാണുകയും പങ്കുവെക്കുകയും ചെയ്യുന്നത്. ‘പരിമിതികള് ശരീരത്തിനാണ്, മനസ്സിനല്ല’ എന്ന് ഹോസെയെ പഠിപ്പിക്കുന്ന ഈ അച്ഛന് ഓരോ രക്ഷിതാവിനും ഒരു പ്രചോദനമാണ്. ഹോസെ ഇന്ന് കരയുന്നത് വേദന കൊണ്ടല്ല, മറിച്ച് ഓരോ ചെറിയ കാര്യങ്ങളും സ്വയം ചെയ്തു തുടങ്ങുന്നതിലെ ആത്മവിശ്വാസം കൊണ്ടാണ്.
