ന്യൂഡല്ഹി: സംഘര്ഷ സാധ്യത നിലനില്ക്കുന്ന ഗല്വാന് താഴ്വരയില് കൂടുതല് സുരക്ഷ സന്നാഹങ്ങളൊരുക്കി ചൈനക്ക് പ്രതിരോധമൊരുക്കുകയാണ് ഇന്ത്യന് സേന. ഇതിന്റെ ഭാഗമായി മിസൈലുകള് വിക്ഷേപിക്കാന് സാധിക്കുന്ന ആറ് ടി-90 ഭീഷ്മ ടാങ്കുകളും കഴിഞ്ഞ ദിവസം സൈന്യം അതിര്ത്തിയില് വിന്യസിച്ചിരുന്നു. ഗല്വാന് നദിയോട് ചേര്ന്ന് ചൈന കൂടുതല് സായുധ സേനയേയും, ടെന്റുകള് സ്ഥാപിക്കുകയും ചെയ്തതോടെയായിരുന്നു ഇന്ത്യയുടെ ഈ നീക്കം. ശത്രുവിനെതിരെ ഏറ്റവും മികച്ച രീതിയില് ഉപയോഗിക്കാവുന്ന സംവിധാനമാണ് ഇവയുടേത്.
ആണവ, ജൈവ, രാസ ആക്രമണങ്ങളെ പ്രതിരോധിക്കാന് ശേഷിയുള്ളവയാണ് ടി-90 ഭീഷ്മ ടാങ്കുകള്. ടാങ്ക്വേധ മിസൈല് സംവിധാനമുള്ള ടി-90യുടെ പ്രഹരശേഷി 100 മുതല് 4000 മീറ്റര് വരെയാണ്. വെറും 11.7 സെക്കന്റ് മാത്രം മതിയാകും ഇവയ്ക്ക് പരമാവധി ദൂരം സഞ്ചരിക്കുന്നതിന്. 23.4 കിലോഗ്രാമാണ് ഇവയില് സ്ഥാപിച്ചിരിക്കുന്ന മിസൈലുകളുടെ ഭാരം. 5 കിലോമീറ്റര് പരിധിയില് താഴ്ന്ന് പറക്കുന്ന ഹെലികോപ്റ്ററുകളെയും ഇവയ്ക്ക് നിഷ്പ്രയാസം തകര്ക്കാനാകും. എക്സ്പ്ലൊസീവ് റിയാക്ടീവ് ആര്മര് ഘടിപ്പിച്ച ടാങ്കുകളെയാണ് ഇവ പ്രധാനമായും ലക്ഷ്യം വയ്ക്കുന്നത്. ഓട്ടോമാറ്റിക് ആയി പ്രവര്ത്തിക്കുന്ന ഇന്റഗ്രേറ്റഡ് ഫയര് കണ്ട്രോള് സിസ്റ്റത്തെ മാനുവലായി നിയന്ത്രിക്കാനും സാധിക്കും. 1600 ലിറ്ററാണ് ഇവയുടെ ഇന്ധനശേഷി.
2001ലാണ് ടി-90 ടാങ്കുകള് വാങ്ങുവാന് ഇന്ത്യ റഷ്യയുമായി കരാര് ഒപ്പിടുന്നത്. 2004ലാണ് ആദ്യ സെറ്റ് ടാങ്കുകള് റഷ്യ ഇന്ത്യയ്ക്ക് കൈമാറിയത്. 2019ലെ കണക്കുകള് പ്രകാരം 1070 ടി-90 ടാങ്കുകളാണ് സൈന്യത്തിന്റെ കൈവശമുള്ളത്. ഇവയ്ക്ക് പുറമെ 2022-2026 കാലയളവിനുള്ളില് 464ഓളം ടി-90 ടാങ്കുകളും സേനയുടെ കരുത്ത് കൂട്ടാനെത്തും.
